اللّه أكْبَرْ اللّه أكْبَرْ اللّه أكْبَرْ اللّه أكْبَرْ
دَامْ عِزِّكْ يَا (الإمَارَاتْ) الْحَبِيْبِهْ فِيْ تِمَامِهْ
فيْ فَرَحْ عِيْد اتِّحَادِكْ نِرْفَعْ الْخَفَّاقْ الاخْضَرْ
بَيْرَقٍ مَا يِرْفَعْ إلاَّ لِلْكَرَمْ وَاهْل الْكَرَامه
الْمِدَاخِنْ بَازْرَقْ الْعُوْد النِّقِيْ قَامَتْ تِبَخْتَرْ
فِيْ مِجَالِسْنَا لِعِيْد (الْجَارْ) مِنْ زَوْد احْتِرَامه
إرْفِعِيْ يَا (دَارْ زَايْد) رَايَةْ النَّصْر الْمِظَفَّرْ
دَامْ عِزّ الرَّايِهْ اللَّي رَفْرِفَتْ فَوْق الْغمامه
رَايِةٍ فِيْهَا النِّقَا الأبْيَضْ وْفِيْهَا الدَّمّ الاحْمَرْ
شَافَهَا الْكَافِرْ هَلاَكْ.. وْشَافَهَا الْمِسْلِمْ سَلامه
رَايِةٍ (زايِدْ) رِفَعْهَا فَوْق فَوْق النَّجم الازْهَرْ
مَا وِقَفْ فِيْ ظِلّهَا مَخْلُوْق مَا عَلَّتْ مِقَامه
إرْفِعِيْهَا وَاللّه انّ الْيَوْم يَوْم الْفَرْح الاَكْبَرْ
مَا عَلَى طَرْفٍ مِنْ الْفَرْحه خِسِرْ لَذَّةْ مَنَامه
فيْ ذَرَى شَيْخ الْبِلاَدْ وْ حِرَّهَا الشَّوَّامْ الاشْقَرْ
شَيْخَهَا اللَّى قِدْ تَعَلَّى الْمَجْد مِنْ ذِرْوَةْ سَنَامه
أسْفَرَتْ بِهْ وَانْوَرَتْ مِنْ حَقَّهَا تَسْفِرْ وْتَنْوِرْ
بِالزَّعِيْم اللَّى كِسَاهَا الْعِزّ وَاوْلاَهَا اهْتِمَامه
رِيْف شَايِبْهَا الْكِبِيْر وْسِتْر ذَاتْ الطَّرْف الاحْوَرْ
وَالِدْ الطِّفْل الْيِتِيْم وْخَاله وْخِيْرَةْ عَمَامه
يِعْتِزِيْ بِــــ (مْحَمَّدْ) اللّي بِهْ خَلِيْج الْعِزّ يِفْخَرْ
مَا تَعَلَّى بِالزَّعَامه بِهْ عَلا رَاسْ الزَّعَامه
ذَاكْ (ابُوْ رَاشِدْ) شِمُوْس الْفِكِرْ مِنْ هَامَتْه تَسْفِرْ
الْفِطِيْن اللَّي رِسَمْ فِيْ كِلّ عِلْمٍ لِهْ عَلامه
وْ يِنْتِخِيْ بِـــــ (مْحَمَّدْ) اللَّي لاَ نِخَتْه الدَّارْ تَبْشِرْ
شَيْخَهَا اللَّي مَا فِتَتْه (الْبِشْت) عَنْهَا وِ(الْعِمَامه)
حَيّ (أبُوْ خَالِدْ) شِبِيْه (الْعَوْد زَايِدْ) يَوْم يِذْكَرْ
فِيْ مَحَبَّةْ نَجِلْ (زَايِدْ) مَا عَلَى حَيٍ مَلامه
عَزِّكْ اللّه يَا خَلِيْجٍ ضَمَّنَا بِالْعِزّ.. وِابْشِرْ
مِنْ يِعِزّ الدِّيْن وِالْمَعْرُوْف عَزّ اللّه مِقَامه
وَاللّه انّا فِيْ وِطَنْ (سَلْمَانْ) نِفْرَحْ وِنْتِبَشَّرْ
يَوْم يِفْرَحْ شَعْب (زِايِدْ) وِيْتَهَنَّى بِالسَّلامه