عَرْش الْجَمَالْ

تَدْرِيْ إنِّكْ مِعْتِلِيْ عَرْشْ الْجَمَالْ

مَا عَلَى حِسْنِكْ شِمُوْس وْ لا قمَرْ

 

فِيْك مِنْ سِحْر الْحِكَايَا.. وِالْخَيَالْ

وَجْنِتَيْك.. وْجَارِحْ الطَّرْف الْحَوَرْ

 

سَلْهِمَتْك لْهَا عَلَى خَدِّكْ ظِلاَلْ

وِاللِّيَالِيْ مِنْ عَلَى امْتَانِكْ شَعَرْ

 

وْفِيْك دِهْن الْعُوْد وِقْنَادْ الدِّلاَلْ

لَى حِكَيْت تْمَازِجَنْ هَيْل وْعِطِرْ

 

يَوْم تُوْقَفْ وَقْفِتِكْ فِيْهَا اعْتِدَالْ

وْيَوْم تَمْشِيْ مَشْيِتِكْ فِيْهَا بَطِرْ

 

خِطْوِتِكْ فِيْهَا تَعَالِيْ وِاخْتِيَالْ

وْلَفْتِتِكْ فِيْهَا عَلَى الْعَالَمْ خِطَرْ

 

إنْت يَا سِيْد الْحَلاوه وِالدَّلاَلْ

خَفِّفْ غْرُوْرِكْ عَلَى بَاقِيْ الْبِشَرْ

 

وِانْتِبِهْ مَا كِلّ هَفْوَاتِكْ.. حَلاَلْ

(الْكَرَامه) تَحْتَهَا.. خَطٍ حَمَرْ