مثابرة

اللَّيله أنْفَاسِيْ تْدَوِّرْ على انْفاسي

زَلَّةْ حَنِيْن ٍ تِجِيْب الْعِلْم وِتْخَابِرْ

 

حاوَلْت أغَالِبْ صِيَاحْ الشَّوْق بِنْعاسي

وْصُوْرَتْك لاعْماقي اللَّى تِشْبَهِكْ سَابِرْ

 

إِنْ قِلْت نَاسِيْك وَاللّه مَانِيْ بْنَاسي

لَو خِطْوَةْ الْبِعْد وَقَّفْ دُوْنها الشَّابِرْ

 

يا صاحِبِيْ يا وجودي يا غَلا ناسي

لا تَحْسِبْ انِّكْ فَقَطْ فِيْ دِنْيِتِيْ عَابِرْ

 

مَرْكَبْ غَرَامِكْ عَلَى مِيْنَا الهوَى راسي

وآذود عَنِّهْ رِيَاحْ الغَدر وَآثَابِرْ

 

لانِّيْ عَرَفْت الهوَى مَعْ طوْلَةْ مْراسي

لو يِنْكِسِرْ.. مَا لِكَسْر قْلوبنا جَابِرْ

 

طَبْع الوفا في دَمِيْ رَغْم انِّيْ آقاسي

طبْع ٍ مِنْ اللّه وْتِرْثَةْ كَابِرْ وْكابِرْ

 

طالِبْك لا تِخْتِبِرْ باسْم الوفا باسي

الشَّكّ لاَ ثَارْ شَيْن.. وْيِقْطَعْ الدَّابِرْ

 

لاَ تِنْخِدِعْ، فِيْك ما يِخْدَعْني احْسَاسي

ما انْت بْمِثِلْ ما فؤادي مِنْ سِنِهْ خَابِرْ..!!

 

ما ادْري هو الحَظّ والاَّ طَبْعِنَا قاسي

أيَّامنا تِشْتِعِلْ وِنْشُوْف.. وِنْكابِرْ..!!

 

ومَهْمَا جَرَى دِبْرَةْ الْمَوْلَى عَلَى راسي

بَاصْبِرْ عَسَى اللّه يِفَرِّجْهَا عَلَى الصَّابِرْ