خطَا الخاطي تعَدَّى الخَطّ دون إذْنٍ وَ لا مَرْسوم

بَعَدْ ما شانَت أفعاله بوَقْت ٍ من زمن ماضي

 

وْرِفْضَنّه بَنَاتْ الغِيْد يعطِنّهْ عِشِقْ مَنْظُوْم

وَلا له في مِسَالِكْهِنْ هوى مسموح أو فاضي

 

يحاوِلْ كِثْر ما يْحاوِلْ تَرَى بَذْر الغلا مَعْدوم

لأنّ ارْضِه غِدَتْ قَفْرا بَعَدْ ما كانت رْيَاضِ

 

خدَعْني بالهوى والحب واصبح ظالِم وْمظلوم

وْوَرَّى في هشيم الجوف نار الْحَرّ وِالَّلاظي

 

تِعِبْت آماري الغالي على جَمْر الغَلا المحموم

عساها تَعْطِف كْفوفه وْتِمْسَحْ دمعة ألْحَاظي

 

يَغَيْر أنّه كِثِرْ ظَنّهْ وغَرَّقْني فْـــ.. بَحَرْ اْلِهْموم

معيِّشْني فِــ.. ضَيْعَاتي يقول انّه بيَعْتاضي

 

حَسَافه وقتي اللَّى ضاع بحِب ٍ خادع وْمَذْموم

جِنَيْت أثماره أشوا كٍ تزيِّدْ له من أبْغَاضي

 

عطيته كل مَا أمْلِكْ لاجِلْ ما يْكون أبَدْ مَحْرُوْم

وْقَاسَمْته هموم الْوَقْت دُوْن أبْدِيْ تعِرّاضي

 

تحمّلْتِه على طَبْعه وجاني غدره المحتوم

هِدَمْ صَرْحي بلغطاته وجا يبكي على انقاضي..!!

 

وشاب الرَّاسْ من فِعْله فَلا فاد العتَبْ وِاللَّوْم

خَلاصْ انْرِفْعَتْ أفْعَاله لخَلاّق السِّمَا القاضي

 

غِدَيْت اليوم ما اتْحَمَّلْ وعودٍ زايفه وحْلوم

تِزِيْد هْمُوْم وَاحْزَان ٍ تِقرِّبْ سِكَّةْ أمْرَاضِيْ

 

عَسَى يومي قَبِلْ يومه أو إنّا نْمُوْت نَفْس الْيَوْم

أخَافْ يْمُوْت قَبْلِيْ وَاسْمِحِهْ عَنْ مَا بِدَرْ مَاضِيْ!!