الْعَلَمْ مَوْت وْحَيَاةْ

الْعَلَمْ فِـ.. قْلُوْبنا رَفْرَفْ وْعَاشْ

نِرْفَعه وِنْعِزّ قَدْره فِيْ سِمَاهْ

 

وِانْ غِدَا فِيْ دَارْهُمْ قِطْعَةْ قِمَاشْ

الْعَلَمْ فِيْ دَارْنَا مَوْت وْحيَاهْ

 

نِعْشَقْ ألْوَانِهْ لَهَا الْخَفَّاقْ جَاشْ

بَاعْذَبْ الأشْعَارْ.. مِنْ نَشْوَةْ غَلاهْ

 

(أبْيَضٍ) كالسِّحْب هَمَّالِهْ رِشَاشْ

وَ(احْمَر ٍ) بِالدَّمّ عَطَّرْنَا ثَرَاهْ

 

وَ(اخْضَر ٍ) فِيْ السِّلْم بَهْجِهْ وِانْتِعَاشْ

وَ(اسْوَد ٍ) كَاللَّيْل لَى يَغْشِيْ عِدَاهْ

 

فِيْ سِمُوَّهْ عِزّ مَا فِيْهَا نِقَاشْ

مَا نِطِيْع وْلا نِسَاوِمْ فِيْ عِلاهْ

 

دُوْنِهْ أرْوَاح ٍ جِسَدْهَا لِهْ فِرَاشْ

كِلَّهَا لَى ثَارَتْ الْهَيْجَا فِدَاهْ

 

رَدِّدُوْا يَا (عْيَالْ زَايِدْ) عَاشْ.. عَاشْ

وِارْفِعُوْا رَمْز الكَرَامه فِيْ سِمَاهْ