يَا عِيْدِيْ اللَّى الْعِيْد لِهْ مِنْك لَمْحَاتْ

                          أنَا أمْس مَرَّيْتِكْ مَلامِحْ وَاغَانِيْ

أنَا مَا نِسِيْتِكْ بَسّ مَرَّيْت بِالذَّاتْ

                         مَا هُوْ عَلَى شَانِكْ أمِرِّكْ عَشَانِيْ

يَا اللَّى إذَا تَطْرِيْ تَغَنِّيْ بِكْ أبْيَاتْ

                      مَلْحُوْنَةْ الإحْسَاسْ عَذْبَةْ مَعَانِيْ

تِقُوْل يَا صَاحْ الْمِوَدِّهْ مِسَافَاتْ

                      وِانْتِهْ عَلَى بِعْد الْمِسَافه مِوَانِيْ

يَا صَاحِبِيْ مَرَّيْت بِكْ وِالزَّهَرْ مَاتْ

                     وَاحْيَتْه ذِكْرَاكْ وْبِقَايَا أمَانِيْ

مَرَّيْت فِنْجَانِكْ وْكِرْسِيْك وَاوْقَاتْ

                     سَاعَاتْ مِنْ عِمْرِكْ وْعِمْرِيْ ثِوَانِيْ

لَوْ فَاتْ أمْس.. اللَّى بَعَدْ أمْس مَا فَاتْ

                    لَعَلِّنَا نِلْقَاكْ بَيْن التَّهَانِيْ

مَعَاكْ لَوْ هِيْ بَعْض الاقْدَاحْ مِرَّاتْ

                  يِحْلا الْمَرَارْ وْيِحْتِفِيْ بِيْ زِمَانِيْ

وِالسَّاعه اللَّى بِكْ تِسَاوَتْ بِسَاعَاتْ

                 وِالْوَقْت مَا يِفْنَى وْ لَوْ كَانْ فَانِيْ

إذَا الْتِقَيْنَا الْعِمر كِلِّهْ مِسَرَّاتْ

               وِاذا افْتَرقْنَا لِلْمِفَارِقْ أغَانِيْ