يَا شَوْق عَهْد الصّبَا الْعِذْرِيْ
يَا مَنْهَلْ الْحِبّ وَاطْيَابه
يَا صَحْوَةْ الْحِبّ فِيْ شِعْرِيْ
يَا خَمْر قَلْبِيْ وْعِنَّابه
لَوَّنْت ذِكْرَاكْ فِيْ عِمْرِيْ
بَاحْلاَمْ وَآمَالْ خَلاَّبه
وَاوْفَيْت يَوْم الْغَدِرْ يَغْرِيْ..!!
وْكِلّ الْمِوَاثِيْق كَذَّبه
لازِلْت فِيْ دَمِّيْ وْفِكْرِيْ
وِالْعِمِرْ وَاقِفْ عَلَى ابْوَابه
مَا ادْرِيْ الْعِمِرْ مَرّ مَا نَدْرِيْ
عَنْ دَوْرَةْ الْوَقْت وِرْكَابه
لازِلْت أنَا وِانْت مِنْ بَدْرِيْ
نِصْحَى عَلَى الْوَعْد.. نِحْيَا بِهْ
وْلازَالْ هَمْسِكْ عَلَى ثَغْرِيْ
وْرِمْشِكْ عَلَى الْقَلْب وَاهْدَابه
وْلازَالْ شَعْرِكْ عَلَى صَدْرِيْ
وَانَامِلِيْ فِيْه لَعَّابه..!!
وْلازَالْ إسْمِكْ عَلَى عِطْرِيْ
وِالطِّيْب مِنْ طِيْب لَى جَابه
وْلازِلْت أنَا النَّوْرَسْ الْبَحْرِيْ
يَوْم الصّبَا طارَتْ أسْرَابه
وْلازِلْت أنَا أهْوَاكْ مِنْ صِغْرِيْ
وَاعْشَقْ مِكَانٍ لَعَبْنَا به
وَاشْتَاقْ ذَاكْ الثَّرَى السِّحْرِيْ
وْدَمْع ٍ مِسَحْنَاهْ بِتْرَابه
مِنْ تِرْبِتِهْ كِحْلِيْ وْتِبْرِيْ
وْتَنْبِتْ عَلَى قَلْبِيْ أعْشَابه