وِدِيْمِةْ

أذْكِرْ الدِّنْيَا الْقِدِيْمِهْ

                  وْ(عِرْش) قَيْظٍ مِنْ جِرِيْد

وْشَايِبٍ عَيْنِهْ كِرِيْمِهْ

                 وَاكْرَمْ الشِّيْبَانْ إيْد

وْبَيْت خَالَتْنَا (وِدِيْمِهْ)

                 مِنْ عَلَى (النَّدّ) الْبِعِيْد

يِبْعَثْ الْوِدّ وْنِسِيْمِهْ

                عَبْق مِدْخَنْ يَوْم عِيْد

فِيْه لـِ(الْخَاطِرْ) حِشِيْمِهْ

             وْفِيْه (رَاعِيْ الدَّارْ) سِيْد

طِيْب مِنْ فِطْرِهْ سِلِيْمِهْ

            وْجُوْد فِيْ وَقْتٍ عِنِيْد

كِلْمَةْ (إقْرَبْ) وِالْعِزِيْمِهْ

            فَوْق شِفَّتْهَا نِشِيْد

تِكْسِرْ أعْوَادْ الضِّرِيْمِهْ

            وْمَرْحِبَا وْسَهْلا تِعِيْد

وِانْ صِدَفْ سَوَّتْ وِلِيْمِهْ

            تِوْصَلْ اللَّى فِيْ (الْمِسِيْد)

كَنَّهَا هَمْلُوْل غَيْمِهْ

          وْكَنّ طِيْبَتْهَا قِصِيْد