وَاللّه انِّيْ مَا حِسَبْت انِّيْ بَاعِيْش
لَيْن أشُوْف بْعَيْنِيْ خْيَانَةْ وطَنْ..!!
صِدْق صَدْمه..!! تِجْعَلْ الْعَاقِلْ يِطِيْش
مِنْ يِبِيْع أهْلِهْ وْيَرْخِصْ فِيْ الثِّمَنْ..؟!
مِنْ يِقِصّ جْنَاحه الْمَصْفُوْف رِيْش؟!
مِنْ يِخَرِّبْ سَاسِهْ اللَّى بِهْ مِكَنْ؟!
مِنْ يِعِضّ الْكَفّ لِى مِنْهَا يِعِيْش؟!
مِنْ يِهِدّ السَّقْف لَى تَحْتِهْ سِكَنْ؟!
مِنْ يِبَدِّلْ بِشْتِهْ الْغَاِويْ بـِ(خَيْش)؟!
مِنْ يِعَافْ الطِّهْر وِيْخَاويْ العفَنْ؟!
مِنْ يِخُوْن احْسَاسِهْ اللَّى بِهْ يِجِيْش
مِنْ يِعَادِيْ الْحَقّ وِيْوَالِيْ وِثَنْ؟!
كَيْف هذا صَارْ فِيْ بْلادي.. وْلَيْش؟!
لاجِلْ مَنْ هذا وْمِنْ تَدْبِيْر مَنْ؟!
يَعْقِبُوْن أهْل الْفِتَنْ لِلدَّارْ جَيْش
وِالوطَنْ لِهْ قاده وْشَعْب وْأمِنْ
والله انَّا مَا نِفَرِّطْ بِهْ.. لَوْ ايْش
قَلْب وَاحِدْ فِيْ الْمِسَرَّهْ وِالْمِحَنْ
مِنْ شِمُوْخ (الْبِرْج) لَى بَيْت (الْعِرِيْش)
مِنْ (قِمَاطْ الْمَهْد) لِخْيَاطْ (الْكِفَنْ)
أصْبِعِيْ لو يَابْ لِيْ دَاءٍ غِشِيْش
بَاقْطَعه فَدْوَى عَنْ أعْضَاءْ الْبِدَنْ
والْوِطَنْ مَحْرُوْز لَوْ مِتْنَا.. يِعِيْش
وْلاَ يِعِيْش فْـ..بَيْتِنَا خَايِنْ وطَنْ