لِلْمَدْح قَوْل.. وْلِلْمَرَاجِلْ فَعَاِيلْ

للطِّيْب ذِكْر.. وللخلايق مقامات

 

للنِّعْم سِلْم.. وْللطِّوايِلْ وسايل

لِلْبَعْض عِذْر.. وْلابْيَضْ الْوَجْه فَزْعَاتْ

 

أمّا رَجِلْ ما عَنْه قِيْلٍ وقايل

وِالاَّ يِحَقِّقْ سَاِبعْ الْمِسْتَحِيْلات

 

وامّا يعِزِّكْ دَرْب لو كان طايل

والاَّ قِصَرْ ذِكْرِكْ بقِصْر المسافات

 

وان شِفْت حَظّي من عَنَا الوقت مايل

أبَشِّرِكْ إنْ كِلّ أبوها سَهَالات

 

لانّ القناعه كَنْز وان حال حايل

لا تِنْزِعِجْ مادام لِلْوَقْت صَدْمات

 

ما هو مهِمّ تْكون عندك بدايل

على الأقَلّ تْكُوْن عندك قَنَاعَاتْ

 

لو كل واحد صار صايل وجايل

ما كان لِحْلوم اللِّيَالِيْ نَهَايَاتْ

 

ولو كل صدرك صار للصِّدْق شايل

ما كان خَابَتْ فِيْ تِجَارِبْك هَقْوَاتْ

 

خَلِّكْ ذِخِرْ في الوقت تعمل عمايل

تِكْبَرْ وْلاَ تِكْبَرْ عَلَيْك الْمِرُوَّاتْ

 

واصْبِرْ ولو كانت ظروفك همايل

يا اخِيْ إعْتِبِرْهَا في دروبك مِطَبَّاتْ!

 

وِاللَّيْلِهْ اللَّى شِفْت فيها الهوايل

عادي.. بَعَدْ بَاكِرْ تِسُوْق الْبِشَارَاتْ

 

حتى الهبوب اللَّى تسوق المخايل

مِمْكِنْ تِسُوْق الضِّيْق فِيْ بَعْض الاوقات

 

كِلّ العلوم اللى تِسَمَّى جِزَايِلْ

تِبْقَى على حَسْب الْعَزِمْ والطّمُوْحَاتْ

 

وِالاَّ العلوم اللَّى تِسَمَّى هِزَايِلْ

لا تِتِّبِعْ فيها طريق وْسياسات

 

مَهْمَا تِسَوِّيْ فِيْ الزِّمَنْ مَا انْت نايل

إلاَّ النِّصِيْب اللَّى مِنْ الذَّاتْ لِلذَّاتْ

 

كِلْ شَيّ في دِنْيَاكْ والعمر زايل

ما هو بدايم غير رَبّ السِّمَاوَات

 

بِيْض العلوم وعِزّ شان وْفضايل

هو راس مَالٍ به تكوِّنْ علاقات

 

سِمْعَةْ رَجِلْ تِهْتَزّ مِنْها قبايل

لو مات.. عِنْد النَّاسْ طَاِريْه مَا مَاتْ

 

لا من صَهَرْ كَبْده بشَمْس القوايل

كَفُوْ يِحَقِّقْ سَابِعْ الْمِسْتَحِيْلاَتْ

 

واكْبَرْ مِثَلْ لا من طَلَبْت الْفَعَايِلْ

شِفْ (زَايِدْ) إشْ سَوَّى بِدَوْلَةْ (الامارات)