لاَ مَا انْسَحَبْت مْن الْحَيَاهْ عِنْدِيْ أمَلْ

عِنْدِيْ أَمَلْ فِيْ اللّهْ خَلاَّقْ الْحَيَاهْ

 

لاَ مَا انْسَحَبْت مْن الْحَيَاهْ كَلاَّ.. وْ بَلْ

لِيْ فِيْ الْحَيَاةْ طْمُوْح بَاوْصَلْ مِنْتَهَاهْ

 

لاَ مَا انْسَحَبْت وْلاَ نِوَيْت آمُوْتْ أنَا

مَادَامْ لِيْ مَوْعِدْ مَعْ الصِّبْح وْبَهَاهْ

 

مَادَامْ لِيْ عَيْنٍ تْرِفّ أهْدَابها

وْمَادَامْ لِيْ رَبٍ وْيَرْضِيْنِيْ رِضَاهْ

 

لاَ مَا انْسَحَبْت مْن الْحَيَاةْ وْشَمْسَهَا

تَشْرِقْ عَلَى الْمِسْكِيْن وِتْدَفِّيْ شِتَاهْ

 

لاَ ما انْسَحَبْت مْن الْحَيَاهْ دَامْ القمَرْ

يِسْهَرْ لاجِلْ عَيْن الْمِعَنَّى فِيْ عَنَاهْ

 

دَامْ الْهِوَا لِلنَّاسْ كِلّ النَّاسْ لا

مَا لِلْهِوَا مَالِكْ سِوَى اللّهْ فِيْ عُلاَهْ

 

دَامْ الْعِصَافِيْر الصِّغِيْرِهْ طَايِرِهْ

وِالزَّهر فِيْ خَدّ الثَّرَى عَاطِرْ شِذَاهْ

 

مَادَامْ غِدْرَانْ السِّمَا فِيْ أرْضِنَا

وَمَادَامْ مَايْ الْمِزْن تِهْوَاه الْفَلاَهْ

 

لاَ مَا انْسَحَبْت مْن الْحَيَاهْ وْلِيْ عَلَى

الشِّبَّاكْ عِصْفُوْرٍ.. وْيَطْرِبْنِيْ غِنَاهْ

 

مَادَامْ خَيْط النُّوْر مِنْ بَعْد الدِّجَى

مَرّ الْعِيُوْن وْقَالْ: حَيَّا عَالصَّلاَهْ

 

مَادَامْ فِيْ ثَغْر الطِّفِلْ بَسْمِه وْعَلَى

خَدّ الزِّهَرْ قَطْره وْفِيْ الْوَادِيْ ظِبَاهْ

 

مَادَامْ فِيْ الأرْوَاحْ بَاقِيْ سَاكِنِيْن

الْحُبّ وِالإيْمَانْ وَاللّه فِيْ سِمَاهْ

 

لاَ مَا انْسَحَبْت مْن الْحَيَاهْ عِنْدِيْ أمَلْ

عِنْدِيْ أمَلْ لاَ مَا انْسَحَبْت مْن الْحَيَاهْ