يَا بِلاَدْ الْكِرَامْ وْيَا عِزِيْز الْمِقَامْ
يَا مَدَارْ السَّلامْ وْقِبْلَةْ الْمِسْلِمِيْن
فِيْ نِفُوْس الْعَرَبْ تَسْمُوْ سِوَاتْ الْغمَامْ
وِالْمَفَاخِرْ حِدِيْث أجْيَالْ لِلطَّيِّبِيْن
كَيْف نِبْدَاكْ حُبّ وْفِيْك مَبْدَا الْكَلامْ
كَيْف نَحْصِرْ شِمُوْخِكْ كِلّ هذي السِّنِيْن
يِسْلَمْ الْحَاكِمْ اللَّي وِفْق نَهْج (الإمَامْ)
يَحْمِلْ الْحِلْم قَلْب وْيَحْمِلْ الْعَدل عَيْن
بِالْحَزِمْ سَلّ فِيْ وَجْه الضَّلال الْحِسَامْ
وْبِالصَّبر طَوَّعْ الْخَايِنْ وْعَزْمه مِتِيْن
(مَمْلَكَةْ عِزّ) تَشْرِقْ فِيْ احْتِدَامْ الظَّلامْ
وْعِنْد نَصْر الْمَظَالِمْ أوَّلْ الْمِنْقِذِيْن
يَوْم (سَلْمَانْ) قَامْ وْكِلّ مِن مَعْه قَامْ
الشِّعُوْب الأبِيّهْ وِالْحِزَامْ الحصين
وْعِيْدَهَا عِيْد لِلْعَالَمْ وْمَهْبَطْ سَلامْ
وْيَوْمَهَا الْمِبْتِهِجْ نَحْرِقْ بِهْ الْحَاقِدِيْن
دَامْ يَوْم الْوِطَنْ وِالْعِزّ لِلشَّعْب دَامْ
عِيْدَنَا عِيْد وَاحِدْ وِالْمَحَبّهْ تِبِيْن
(السِّعُوْدِيِّهْ) بْصَدْر الْمِفَاخِرْ وِسَامْ
مَوْطِنْ الْمَجْد دَامَتْ لِـ(الْخَلِيْج) العرين
وِ(الإمَارَاتْ) قَلْب وْنَبْض لِلإحْتَرَامْ
مَعْ عموم الْعَرَبْ فِيْ دَعْمَهَا مَا تِلِيْن
يِسْعِدْ الله بِلادٍ دَوْم ذِرْوَةْ سَنَامْ
وْيِحْفَظْ الله ثَرَاهَا مِنْ هِوَى الْمِفْسِدِيْن