صِبَاحِكْ حِلْم.. يِلْعَبْ فِيْ عِيُوْن السَّالفه إنْسَانْ

وْكَفّ الْوَقْت تَبْكِيْ عِمْر.. وِالأرْقام حِرْمَانِهْ

 

شعوري بَارِدْ.. وْبَالِيْ شِوَارِدْ وِالْعَذَابْ ألْوَانْ

مَعْ انّ الْقَلْب غَايِبْ.. وِالْحِضُوْر يْجِفّ هَتَّانِهْ..!!

 

وِصِلْت أبْعَدْ مِنْ حْدُوْد الْكَلاَمْ وْقَالَتْ: الأوْزَانْ

تَرَى لِيْ خَاطِرٍ مَكْسُوْر لَوْ تَجْبِرْك قِيْفَانِهْ

 

وِقَفْت.. أعِيْد تَرْتيِبْ المسافه وَيْنِهْ الْعِنْوَانْ

يِشَكِّلْني مَعْ احْزَانِيْ وَانَا شَكَّلْت أحْزَانِهْ

 

عَلَى مَطْلَعْ صِبَاحِكْ حِلْم أبِيْ أسْتَرْسِلْ الأشْجَانْ

لأن المسأله أكْبَرْ مِنْ التَّفْكِيْر بَارْكَانِهْ

 

لَوْ انّ الْمَسَأله قِصَّةْ غَرَامْ وْعَاشِق ٍ وَلْهَانْ

أنا اشْهَدْ مَا بِكَيْت وْقِلْت: مَعْشُوْقَتْك وَلْهَانِهْ

 

وْلَوْ انّ الْمَسْألِه (مَبْلَغْ) تَبِيْ تِلْقَى لها استحسان

لأن الصَّبْر مِفْتَاحْ الْفَرَجْ فِيْ ضِيْق بِيْبَانِهْ

 

مَا دَامْ انّ الْعِلِمْ جَمْره، رموز البارحه دِخَّانْ

تسافِرْ.. وِالزِّرَاقْ اللَّي يشِقّ البحر أوجانه..!!

 

وْجَرْحِيْ كَالْهِنُوْد الْحُمْر يِتْفَرَّعْ بَلا أوْطَانْ

لاجِلْ يَرْوِيْ عِرُوْق الْيَاسْ يَسْكِنْ غِرْبَةْ أوْطَانِهْ

 

يقولون الأمَل يِحْتَاجْ قَلْب ٍ مِمْتِلِيْ إيْمَانْ

لأن اللّه لِهْ حِكْمه وْكَفّ الْعَدِلْ مِيْزَانِهْ

 

دِخِيْل الصَّمْت وِعْلُوْم الْمَحَانِيْ لَيْلِيْ التَّعْبَانْ

يِتِيْم بْعَالَمْ عْيُوْن السَّهَرْ.. وِدْمُوْع ذَبْلانه..!