سِيْرَة أحْلاَمْ

نَامَتْ عَلَى صَدْر اللِّيَالِيْ أمَانِيْ

وِتْسَاقِطَتْ مِنْ رِمْش الاحْلام سِيْرِهْ

 

يَا اللَّى تَعَدَّوْنِيْ وَانَا فِيْ مِكَانِيْ

أنَا حِلِمْت وْكَانَتْ إيْدِيْ قِصِيْرِهْ..!!

 

ضَاقْ الْمِدَى وَاهِزّ كَتْف الْمَعَانِيْ

وِاقُوْل يَمْكِنْ تَالِيْ الْوَقْت خِيْرِهْ

 

وِالْوَقْت مَا تْصَدَّقْ عَلَيْنَا بْثِوَانِيْ

إلاَّ وْخِيُوْط الْهَمّ تِغْزِل مِسِيْرِهْ

 

يَا صِبْح أنَا أتْوَحَّدْ مَعَاكْ.. وْعِسَانِيْ

ألْقَى لْضِيَاعْ الْيَوْم مِنِّكْ بِصِيْرِهْ

 

يا صِبْح عَلِّمْ هَالْجِمَاعه بْزِمَانِيْ

إِنَّا كِبَارْ وْعِشْنَا دِنْيَا صِغِيْرِهْ

 

ما هي غريبه إنْ بِكَيْنَا وْنِعَانِيْ

دَامْ السِّمَا تَبْكِيْ مَعْ إِنْهَا كِبِيْرِهْ

 

حِنَّا فِقَارَى حَظّ.. بَسّ الأمَانِيْ

تَكْسِيْ عِرَاةْ الْحَظّ فِيْ كِلّ دِيْرِهْ