شَهْد الْغَنَجْ

ظَبي قَفْرٍ مِنْ عَلَى خَدِّهْ عَلامِهْ

                                 تِذْبَحْ الْعِشَّاقْ فِتْنَةْ طَرْف عَيْنِهْ

مِنْ غُوَاهْ وْرِقِّتِهْ وْحِلْو ابْتَسَامِهْ

                                جَا يِصِبّ الصِّبْح فِيْ كاسْ الْمِدِيْنِهْ..!!

احْتِضَنْ كَفِّهْ لِكَفِّيْ فِيْ سَلامِهْ

                                وْنِبْتَتْ بْكَفِّيْ جَنَايِنْ يَاسِمِيْنِهْ..!!

سَايِحْ الْمَلْمَسْ مِثِلْ نَفّ الْغُمَامِهْ

                                ذَابْ قَلْبِيْ قَبِلْ كَفِّيْ فِيْ يِمِيْنِهْ..!!

دُوْن مَا ادْريْ يَنْصِبْ فْـ.. صَدْريْ خِيَامِهْ..!!

                                كِلْ مَا يَعْزِفْ تَرَانِيْم السِّكِيْنِهْ

خَمْرَةْ النَّشْوه عِنَبْهَا مِنْ كَلامِهْ

                                وِالْغَنَجْ يَقْطِرْ شَهَدْ مِنْ شِفِّتَيْنِهْ

ذَوْق.. حَتَّى فِيْ عِتَبْه وْفِيْ مَلاَمِهْ..!!

                              مَا يِقَلِّطْ فِيْ عِتَبْه إِلاَّ سِمِيْنِهْ

فِيْ مَلاَمِهْ بَثّ وَجْدٍ مِنْ غَرَامِهْ

                            خَاطِرِهْ يِشْبَهْ ضِيَا طَلْعَةْ جِبِيْنِهْ