يَا (بُوخَالِدْ) لاَ نِقَاشْ وْ لاَ كَلاَمْ

نِنْتِظِرْ مِنِّكْ أوَامِرْ سَاميه

 

مَا نِعَدِّيْهَا كَذَا بَرْد وْسَلامْ

لَيْن مَا نَرْوِيْ الْكِبُوْد الظَّاميه

 

عَلِّمْ (الْخَايِنْ) يِوَاجِهْ الاِنْتِقَامْ

ضَرْبَةْ (عْيَالْ الْفَلاحِيْ) حَاميه

 

مَا نِمِرّ الْمَعْركه مَرّ الْكِرَامْ

حِنْ مَخَالِبْنَا مَخَالِبْ دَاميه

 

سَابْقَاتْ الصَّوْت مِنْ فَوْق الغمام

تِقْطَعْ فْيُوْي الْخَلا الْمِتْرَاميه

 

يَوْم سَرَّوْهَا عَلَى جِنْح الظَّلاَمْ

إهْدِرَتْ مِثْل الْبِحُوْر الطَّاميه

 

تَرْجِمْ جْحُوْر الْمَعَادِيْ بِانْتِظَامْ

تِنْتِهِيْ هذي.. وْهذي رَاميه

 

حِنْ (عَرَبْ زَايِدْ) نِضِيْم وْ لا نِضَامْ

وِالسِّوَاعِدْ فِيْ اللِّزَمْ مِتْحَاميه

 

رَمْز لِلْقُوّهْ وْرَمْزٍ لِلسَّلاَمْ

تِحْتِمِيْ فِيْنَا الشِّعُوْب النَّاميه