يَا حَيّ حِرٍ لِلْعِلاَ سَتَّلْ وْحَامْ

وَقْفَتْك حَيِّهْ تَسْتِحِقّ التّحِيِّهْ

 

وِقَفْت فِيْ صَفّ الْوِطَنْ مَاسِكْ الزَّامْ

فَرْدٍ يؤدِّيْ الْخِدْمِهْ الْعَسْكِرِيِّهْ

 

مَا هي غريبه وَقْفِتِكْ وِانْت.. (عَزَّامْ)

أسْمِكْ يِتَرْجِمْ رُوْحِكْ الْمَعْنَوِيِّهْ

 

عِزْوَتْك (مَكْتُوْم) الْفَخَرْ ذِخر وِحْزَامْ

مِنْ جِذر (يَاسْ) اللاَّبه اْليَعْرِبِيِّهْ

 

حِكَّامْ مِنْ حِكَّامْ مِنْ رِسّ حِكَّامْ

اَهْل التِّفَقْ وَاهْل الكفوف النِّدِيِّهْ

 

وِالْجَدّ (رَاشد) مِعْجِزَةْ صَبْر وِالْهَامْ

ظَلَّلْ عَلَى الأوطان وِالشَّمْس حَيِّهْ

 

وابوك قَبْلِكْ مَوْقِعِهْ دَوْم قِدَّامْ

لَى لِقِّمْ الْبَارود فِي الْبِنْدِقِيِّهْ

 

رَمْزٍ مِنْ رْمُوْز الْوِطَنْ كِلّ مَا شَامْ

صَوْب الْعِلا وِالْعِزّ شامَتْ دِبَيِّهْ

 

واخوك (حمدان) الْمِكَارِمْ وْالاِقْدَامْ

وِسْط الْمَحَافِلْ رَاِيِتْه عَالَمِيِّهْ

 

دِمْتُوْا لنا قاده وْقِدْوَاتْ وِحْسَامْ

تاجٍ نِمَارِيْ بِهْ جِمِيْع الْبِرِيِّهْ

 

وَاللَّه يعِزّ الدَّارْ وِيْعِزّ الاِسْلامْ

بَاهْل الْوِفَا شَرْوَاكْ وَاهْل الْحِمِيِّهْ

 

مَوْقِفْك فَخْر.. وْوَقْفِتِكْ عِزّ وِاقْدَامْ

أرْفَعْ لِكْ إبْهَامِيْ وَأدِّيْ التّحِيِّهْ