(لاَلْ).. وِ(اللاَّلْ).. مَا دَوَّرْت غَيْر أشْهِبِهْ

مِنْ عِنَادِيْ عَلَى وَصْلِهْ عِقَدْت الأَمَلْ

شِيْمَةْ أسْلاَفْ تِيْجَانْ الْفَخَرْ وِنْسِبِهْ

تِعْتِزِيْ قَبْل لا افَكِّرْ بِعَزْل (الْهِمَلْ)

مَا يِخَيِّبْ رِجَاكْ وْلاَ رِجَا مِنْجِبِهْ

كِلّ مَنْ طَابْ سَاسِهْ فِيْ الشِّدَايِدْ صِمَلْ

دُوْنِكْ الصَّدْر وِضْلُوْعه.. وْدَوْك إحْطِبِهْ

وْشِبّ فِيْ ضْلُوْعِيْ النِّحَّلْ وِقَايدْ سِمَلْ

إنْت طَرْفِكْ يِهِدّ الْحَيْل عَكْش هْدِبِهْ

كِلّ طَرْفٍ يِشُوْفِهْ عَلّ حَتَّى ثِمَلْ

صِرْت مَا اشُوْفِهْ.. إِلاَّ صِرْت شَوْف أشْربه

وَاثْمَلِكْ وَاثْمِلِكْ مِنِّيْ بِخَمْر الْجُمَلْ

عَنْ مِلُوْك الْحِسِنْ حِسْنِكْ فَرَقْ مَوْكِبِهْ

فِيْك طِغْيَانْ فِتْنِهْ فَوْق مَا يِحْتَمَلْ

بَيْت شِعْرٍ (صَدِرْ) زَفِّهْ وْ(عَجْز) سْحِبِهْ

وْفِيْك يِتْنَازَعْ (الْوَافِرْ) وْبَحْر (الرَّمَلْ)

وْآه مِنْ فَرْعِكْ وْمِتْعَةْ سَهَرْ غَيْهِبِهْ

ظِلّ فِيْه اسْتِظَلّ البَدْر لَمَّا اكْتِمَلْ

صَاحِبِكْ مَا تَغَيَّرْ فِيْ الزِّمَنْ مَذْهِبِهْ

لَوْ يِبَيَّعْ ثِيَابِهْ مَا يِبِيْع الْجِمَلْ..!!