أسْرَابْ

خِذْنِيْ تَرَانِيْم يَا (زِرْيَابْ)

عَوِّدْ وْدَنْدِنْ عَلَى الْغَابِيْ

رُوْحِيْ جِرُوْح وْطُعُوْن حْرَابْ

وِالصَّبِرْ شِيْمِهْ مِنْ آدَابِيْ

شِبْت وْصِبِيْ الْعَيْن مِنِّيْ شَابْ..!!

وِتْمَرْجَحْ الشَّيْب بَاهْدَابِيْ..!

تَرَّكْت شَيْبِــيْ بِدُوْن خْضَابْ

لا يِكْبَرْ بْنَفْسِيْ إِعْجَابِيْ

تِصَافِقَتْ بِالرِّيَاحْ أبْوَابْ

تِغْتَابِنِيْ عِنْد غِيَّابِيْ..!!

إِنْ طِفْت مِخْلَبْ تِوَثَّبْ نَابْ

مَا يِنْهَشْ إِلاَّ مِنْ أعْصَابِيْ..!

آسَدِّدْ حْسَابْ تِلْو حْسَابْ

وِالْوَقْت دَيَّانْ وِمْرَابِيْ

أيَّامْ عِمْرِيْ تِطِيْر أسْرَابْ

وَاتْقَرَّبْ أكْثَرْ مِنْ تْرَابِيْ

جِيْل ٍ تِوَافَدْ وْجِيْل ٍ غَابْ

والْمَوْت يَحْصِدْ مِنْ أتْرَابِيْ

إِنْ صِرْت فِيْ رَوْضَةْ الْمِحْرَابْ

دَمَّيْت فِيْ الدَّمْع بِثْيَابِيْ..!!

يَوْم الْحَشِرْ مَا تِفِيْد أنْسَابْ

وْلاَ مِنْ مْجَامِلْ وْلاَ مْحَابِيْ

طَالِبْك يَا الرَّازِقْ الْوَهَّابْ

لا تْحْرِمْ يْمِيْنِيْ.. كْتَابِيْ