يَا قِبْلَةْ الْعَاشِقْ وْيَا مَنْبَعْ الزَّيْن
يَا (دْبَيّ) يَا بَيْت الشِّعِرْ قَاصِدِيْنِكْ
عَاشِقْك غَوَّاصْ الدِّجَى يَعْرِفِكْ زَيْن
عَاشِقْك عَزِّكْ وِالْفَخَرْ مَا يِهِيْنِكْ
تَارِيْخ مِضْمَارِكْ كِثِيْر النِّيَاشِيْن
مِنْ هَابَوْا الْمِضْمَارْ هُمْ هَايِبِيْنِكْ
زَهْرَةْ شَبَابْ وْعِمْركْ إِمْيِهْ وْثِمَانِيْن..!!
عَجِيْب حِسْنِكْ يَرْتِوِيْ مِنْ سِنِيْنِكْ
قَرْن وْثِمَانْ عْقُوْد وِانْتِيْ تِعَرْفِيْن
عَشْرَةْ شِيُوْخ ٍ بِالْعَدِلْ حَافِظِيْنِكْ
وَالْف وْثِمَانميه وْثَلاثه وْثَلاثِيْن
هُوْ مَوْعِدْ الدِّنْيَا مَعْ انْوَارْ عَيْنِكْ
يَا عَشْقَةْ (الْمَكْتُوْم) لِكْ حَقّ تَحْكِيْن
وِلْنَا الشَّرَفْ نِسْمَعْ سِيَرْ مِبْدِعِيْنِكْ
(مَكْتُوْم) الاوَّل سَيِّدْ الْعَزم وِاللِّيْن
نُوْر ٍ شِعَاعه بَانْ فِيْ مِقْلِتَيْنِكْ
وْ(سِعِيْد) وْ(حَشِرْ) اللَّي ثِبَتْ مَعْهُمْ الدِّيْن
أمْن وْأمَاْن يْفِيْض مِنْ رَاحِتَيْنِكْ
وْ(راشد) وْ(مَكْتُوْم) وْ(بِطِيْ) مَعْهُمْ سْنِيْن
عِز ٍ بِهْ اللُّوْلُوْ عِمَرْ سَاحِلَيْنِكْ
وِ(سْعِيْد) وْ(راشد) غَيِّرَوْا ثَوْبِكْ الطِّيْن
أجْمَلْ مِوَانِيْ الشَّرْق بِنْيَتْ لِعَيْنِكْ
وْمِنْ بَعْدِهُمْ (مَكْتُوْم) فِيْ الْعَامْ تِسْعِيْن
صِرْتِيْ السّؤال الصَّعْب مِنْ زَوْد زِيْنِكْ
خَطَّوْا رِسَالَتْهُمْ مِنْ اقْصَى الشَّرَايِيْن
يَرْجُوْن هذا هُوْ كِتَابِكْ يِمِيْنِكْ
وِالْيَوْم يَا بِنْت الْفَخَرْ لَوْ تِعَزْوَيْن
عِزْوَتْك (بِنْ مَكْتُوْم) حَامِيْ عِرِيْنِكْ
الْقَاده اللَّي دَرِّسَوْا لِلْمَلايِيْن
كَيْف الْحِكِمْ يِزِيْد لِكْ عَاشِقِيْنِكْ
وِالْعَاشِقْ الْعَاشِرْ مَعِكْ صَارْ نِصْفَيْن
مَاضِيْ وْمِسْتَقْبَلْ وْحَاضِرْ يِعِيْنِكْ
يَا (مْحَمَّدْ الرَّاشِدْ) طِمُوْحِكْ إِلَى وَيْن؟
نَافَسْت نَفْسِك!!.. تِعْبَوْا مْنَافِسِيْنِكْ..!
سَابِقْ زِمَانِكْ فِيْ جِمِيْع الْمِيَادِيْن
وِالْمِسْتَحِيْل أرْهَبْتِهْ بْحَاجِبِيْنِكْ
دَانَتْك قِبْله والْحَضَاره بِهَا دِيْن
وِانْت الإمَامْ الْعَادِلْ.. الْعَدِلْ دِيْنِكْ
صَارَتْ (دُبَيّ وآل مَكْتُوْم).. وَجْهَيْن
عِمْلَةْ عَدِلْ وِاحْسَانْ.. تِسْلَمْ يِمِيْنِكْ
الْحَاضِرْ إخْتَارِكْ بِصَرْ وانْت لِهْ عَيْن
وِالْفِكر نُوْره يِعْتِلِيْ مَنْكِبَيْنِكْ
قِدْهُمْ وْنَوِّرْ فِكْرِهُمْ وِاظْهِرْ الْبَيْن
يَا اللَّى الْحَضَاره سِبْحِةٍ فِيْ يِدَيْنِكْ