الصَّوْت الْجَرِيْح

جِيْتِكْ عِذِرْ كِلّ الْحِيَا فِيْه عِنْوَانْ

صَوْتِيْ تِجَرَّحْ وِالنِّدَمْ مَالِمِنِّيْ

جِيْتِكْ أدَوِّرْ عَطْف مَا دِمْت غَلْطَانْ

شِفْت الْعِتَبْ مِنِّكْ وَانَا الْعِذِرْ مِنِّيْ

إِنْسَى الْخِطَا وِاتْذَكَّرْ آيَاتْ غِفْرَانْ

سَهْو الْخِطَا مَا فِيْه ظُلْم وْتِجَنِّيْ

مَا اقْسَى سِكُوْتِكْ صَارْ لِلصَّدّ بُرْهَانْ

يَلْغِيْ وِجُوْدِيْ فِيْك وِمْأَنِّبِنِّيْ

مَا تْشُوْفِنِيْ بَعْدِكْ أنَا قَلْب وَلْهَانْ؟

عِطْنِيْ دِخِيْلِكْ فِرْصِتِيْ وِامْتِحِنِّيْ

مَعْذُوْر جِفْنٍ سَامَرَهْ دَمْع سَهْرَانْ

لَحْظَاتْ لَيْلِهْ مَوْت.. مَرّ بْتَأَنِّيْ..!

عِمْرِيْ ظَلاَمْ وْمَا بِقَى فِيْه تِحْنَانْ

يَا مِتْعِبِنِّيْ.. إِرْفَعْ اللَّيْل عَنِّيْ

جَفّ الْكلاَمْ وْغَادَرْ الشَّوْق عَطْشَانْ

كِلّ اعْتِذَارِيْ ذَابْ فِيْ مِنْ فِتَنِّيْ