صَوْت (الشَّامْ)

يَا كِثْر مَا شَالَتْ ضلوعي من آلام

ولا دَرَى فِيْهَا مِنْ الْخَلْق مَخْلُوْق

 

واذا لزمت الصَّمْت ما نيب مِنْلام

وِشْ لي أفِكّ حْلُوْق وَاسَكِّرْ حْلُوْق

 

أمْشِيْ وَافَضْفِضْ لَيْه؟ وِالْعَالَمْ تْنَامْ

وَانَا اسْهَرْ لْحَالِيْ وَلاَ اغَمِّضْ الْمُوْق

 

لَوْ الْحَكِيْ يِنْفَعْ نِفَعْ قَبِليْ (الشَّامْ)

اللَّى تِجِرّ الصَّوْت وِالصَّوْت مَخْنُوْق

 

خَلُّوْنِيْ أسْكِتْ دَامْ الايَّامْ قِدَّامْ

لانّ الْعَرَبْ تَقْضِبْ عَلَى كِلّ مَنْطُوْق

 

يَمْكِنْ أخِطّ أقْلاَمْ وَاوْهَامْ واحْلاَمْ

لكنِّيْ أبْقَى دَايم ٍ نَظْرِتِيْ فَوْق

 

من لا يسَفِّحْ فِيْ سِمَا الْعِزّ لا حَامْ

تِرْبَطْ يِدَيْنِهْ عَنْ سِمَا الْحَوْم بِسْبُوْق

 

النَّفْس مِثْل الْحِرّ وِالْحِرّ عَزَّامْ

وِاللَّى يشِدّ الْعَزم مَا عَاقه الْعَوْق

 

وانا اعْتِرِفْ صَبْرِيْ تَرَدَّى مِنْ الْعَامْ

لانِّيْ أخِيْط الْجَرْح وَالْقَاهْ مَفْتُوْق..!!

 

مَا عَادْ بَاقِيْ غَيْر تَنْكِيْس الاعْلام

مِنْ كِثْر صَبْرِيْ مَلِّنِيْ كِلّ مَعْلُوْق