البَرْد يلْسَعْني.. ويلْفَظْني الَّليْل
تعال دَثِّرْني قصيد وْغَنَاوِيْ
تعَبْت أحِطّ بْوَجْه الايّام وَآشِيْل..
طِفْلٍ رماه الوَقْت عُرْي.. وْخَلاوي!
يا سيّد الما.. وِالغَلا.. والمحاصيل..
غَنَّتْ لك الفَرْقى.. وتاهَتْ خطاوي!
شِفْني (وحيد).. ودْاخلي تركِضْ الخَيْل!
شِفْني (كثير).. وْذِيْب الاغراب عاوي
تعال غِيْظ حْكايَةْ البِنّ والهَيْل..
تعال أبَاثْمَلْ وَصْل.. واسْكَرْ هواوي!
تعال أبَابْصِرْ بك.. شموع.. وْقناديل
تعال أبَاسْتِرْ بك ظنون وْهقاوي
تَعْجِبْك حِيْرة شاعرٍ نايِهْ: الْوَيْل
حِزْنه جَرِيْء.. وْبَوْح حَرْفه حَيَاوي!
تمضَغْه: (وينك؟).. وِيْتِنَاثَرْ: مواويل
وِتْلِمِّه أشجانه على شْفاه غاوي!
يزْرَع يبَابِه.. حِلْم تِيْه المقابيل
ويَحْصِد صدى حِلْمه: (مِثِلْ مَا انْت نَاوِيْ)!
(مَرَّتْ سِنِهْ..) مُرّه.. غياب.. وذبَلْ جِيْل
فِيْنِيْ.. وَلاني عن تِجَاهِلْك قاوي
شِفْني مداين من حنين.. وْأقاويل
تِتْسَوَّلْ جْراحه لرحمة مِداوي
ما ادري تطول حْكايَةْ الْبَرْد وِالَّليْل..؟
إن طَوَّلَتْ بَيْعَوِّدْ الغِصن ذاوي!