الْمِطَارَاتْ.. وْضِجِيْج الطَّايْرَاتْ

والتَّعَبْ.. وِالنَّاسْ.. وِالْقَلْب الحزين

 

وِالْمِفَارَقْ لِهْ عِوَاصِفْ عَاتِيَاتْ

دَمّرَتْنِيْ بْكِلّ مَا تَمْلِكْ.. حنين

 

مَنْ يِجَمِّعْنِيْ وَانَا كِلِّيْ شِتَاتْ

مَنْ يِعَدِّيْنِيْ مَحَطَّاتْ السِّنِيْن

 

مَنْ يِنَسِّيْنِيْ جِمِيْع الذِّكْرَيَاتْ

وِالْتِفَاتَاتِيْ لِوَجْه الرَّاحِلِيْن

 

مَنْ يِسَاعِدْنِيْ بِلُوْغ الأمْنِيَاتْ

مَنْ يِخَرِّجْنِيْ سِجُوْن السَّاهِرِيْن

 

مَنْ يِعَرِّفْنِيْ بِمَا تَعْنِيْ.. سِبَاتْ

أوْ يِذَكِّرْنِيْ ثواب الْقَايْمِيْن

 

خَايِفْ أفْقِدْ مَا بِقَى بِيْ مِنْ ثِبَاتْ

وَآتِجَرَّدْ مِنْ سِمَاتْ الصَّابِرِيْن

 

خَايِفْ الأشْوَاقْ تاخِذْني.. وَابَاتْ

فِيْ زَنَازِنْهَا مَعْ أحْزَانِيْ سِجِيْن

 

خَايِفْ الْغِرْبه تِنَسِّيْنِيْ سِمَاتْ

لاجْلَهَا مَاتَوْا أهَلْنَا الأوّلِيْن

 

آهْ يَا مَا اصْعَبْك يَا هذا الشِّتَاتْ

فِيْ مِتَاهَاتِكْ أنَا أمْشِيْ لِوَيْن؟

 

بِكْ أرَى نَفْسِيْ مِنْ الأرْبَعْ جِهَاتْ

أمْلِكْ القوّه، وْعَزْم الطَّامحين

 

لاَ تِوَرِّدْنِيْ مَحَطَّاتْ الْعِصَاةْ

لاَ تِبَاغِتْنِيْ وْتِصْنَعْ لِيْ كمين

 

إِكْتِشِفْ فِيْ دَاخِلِيْ كِلّ الصِّفَات

لاَ تِشَبِّهْنِيْ بِذَوْلا الْعَابِرِيْن

 

أخْتِلِفْ جِدَّاً لَوْ اشْبَاهِيْ مِئَاتْ

مَا لإِحْسَاسِيْ وْذَاتِيْ أرْبِعِيْن..!!