أمْسِيَاتْ الشِّعِرْ يَا أهْل الثَّقَافه

مِنْ هُوْ المسؤول عَنْ هَالأمْسِيَاتْ

 

خَبِّرُوْنَا.. كَانْ مَا فِيْهَا كَلاَفِهْ

قَبِلْ لاَ نَكْشِفْ عِلُوْمٍ خَافِيَاتْ

 

عَ حِسَابْ الشِّعر صَارْ اللَّى نِخَافه

مَا طَلَعْ غَيْر.. الْمِهَرِّجْ لِلْبَنَاتْ..!!

 

صَارَتْ السَّاحِهْ.. تِرَدِّدْ يَا حِسَافه

إٍنْتَهَى الإبْدَاعْ وَاصْبَحْ ذِكْرَيَاتْ

 

يَوْم بَحْر الشِّعر.. مَا يَرْوِيْ ضِفَافه

ما رِوَى كَاسْ القلوب الظَّامِيَاتْ

 

مَا وَرَا إحْسَاسكم غَيْر السَّخَافه

والشِّعر مَا هُوْ بْكُوْره.. (خِذْ وْهَاتْ)

 

وْلَى يِدَوِّرْ.. مِنْ وَرَا شِعْره (كِنَافه)

عَظِّمَوْه وْحَرْفه أصْبَحْ مِنْجِزَاتْ

 

وْقَبِلْ يِدْعَى.. حَوِّلَوْا لِهْ عَ (الصِّرَافه)

حَرْفِنَا (صِيْنِيْ) وْحَرْفه (مَاركات)

 

بَيْن قَوْسَيْن اطْلَعَتْ.. (مَلْيُوْن آفه)

(نَاظِمْ) وْ(مِسْتَشْعِرْ) وْ(مِسْتَشْعِرَاتْ)..!!

 

لانِّهْ أصْدَقْ مِنْ.. عَنَاوِيْن الصَّحافه

مَا يقول إِلاَّ الحروف الْعَارِيَاتْ

 

طَاحَتْ (الْغَافه) عَلَى... عِنْق (الزِّرَافه)

يَوْم بَانْ اللِّعْب مِنْ خَلْف الْعِبَاةْ

 

بَسّ بَحْر الْقَافْ.. مَا يَعْلِنْ جِفَافه

مِسْتَحِيْل آعِيْش بِهْ مَعْدُوْم ذَاتْ

 

مَيِّتٍ مَادَامْ صَدْر الْبَحر عافه

وْحَيّ مِنْ خَلَّدْ حِرُوْفٍ سَامِيَاتْ

 

لى يِكَتِّفْ كِلْ.. اْلاَيْدِيْ عِنْد قافه

حَيّ فِي قْلُوْب الْبِشَرْ لَوْ كَانْ مَاتْ

 

يَوْم بَعْض النَّاسْ عَايِشْ فِيْ خُرَافه

فِصّ مِلْح وْيَحْسِبِهْ سِكَّرْ نِبَاتْ

 

الكتاب يْبِيْن مِنْ ظَاهِرْ غِلافه

وِالْعَرَبْ تِفْهَمْ بَدون مْلاَحِظَاتْ

 

شَاعِرٍ.. مَا جِيْت مِنْ بَابْ اللِّطَافه

غِيْرِتِيْ عَ الشِّعر تَرْفِضْ مِغْرَيَاتْ

 

لا تقولون الْمَرَضْ.. صِعْب اكْتِشَافه

الْخَلَلْ مَا هُوْب مِنْ أرْبَعْ جِهَاتْ

 

الْخَلْل فِيْ قْلُوْب.. تِحْتَاجْ لْنِظَافه

يَعْنِيْ الْمَوْضُوْع مَا يَبْغِيْ سِبَاتْ