إسْعَى إلَى حِلْمِكْ وْحَدِّدْ مِسَارِكْ

وِانْ مَا قِدَرْت تْحَقِّقِهْ، خَيْر يَا طَيْر

 

لاَ تَاخِذْ الدِّنْيَا عِنَادْ وْمَعَارِكْ

إِذَا ادْبَرَتْ خِيْرِهْ وِاذَا انْهَا اقْبَلَتْ خَيْر

 

قَلْبِكْ دِلِيْلِكْ.. وِالْعَقِلْ مِسْتِشَارِكْ

واللَّى كِتَبْه الله لِكْ يْصِيْر.. بَيْصِيْر

 

أنَا احْتِرِمْ وِجْهَةْ نِظَرْك وْخِيَارِكْ

لَوْ كَانْ مَا لِلَّي حِصَلْ أيّ تَبْرِيْر

 

وِالْقَلْب هذا اللَّى ابْتَلَى وِاسْتَخَارِكْ

كِبِيْر مِنْ قَبْلِكْ وْمِنْ بَعْدِكْ كْبِيْر

 

حَتَّى وْلَوْ انِّكْ كِوَيْتِهْ بِنَارِكْ

يمُوْت مَا يَشْكِيْ عَلَيْك وْعَلَى الْغَيْر

 

السَّالفه مَا هِيْب ثَارِيْ وْثَارِكْ

لاَ انْتِهْ (كِلَيْب) وْ لاَنِي بْــ(سالم الزِّيْر)

 

إذَا جَرَحْتِكْ دُوْن مَا اقْصِدْ.. تِدَارَكْ

وِالاَّ بِدَرْ مِنِّيْ بَلا عَمْد.. تَقْصِيْر

 

إِجْرَحْ وْخِذْ حَقِّكْ وْ رِدّ اعْتِبَارِكْ

وِانْ زِدْت فَوْق جْرُوْحِكْ جْرُوْح.. لاَ ضَيْر

 

اللَّى منَزِّلْ فِيْ كِتَابِهْ (تِبَارَكْ)

نَزَّلْ لِكْ فْــ.. قَلْبِيْ مَحَبِّهْ وْتَقْدِيْر

 

مَحَبِّةٍ مَا تِنْحِصَى وْمَا تِشَارَكْ

سِتْر وْ غِطَا أوْ سَمَّهَا سِرّ فِيْ بِيْر

 

مَا جِيْت أقُوْل إرْجَعْ وْ رَاجِعْ قَرَارِكْ

أوْ أنْتِظِرْ مِنِّكْ إجَابِهْ وْ تَفْسِيْر

 

وْمَا جِيْت أقُول إِشْ حَالِكْ؟ وْ وَيْن دَارِكْ؟

وْ لا اعْتِذِرْ.. وْ لاَ أدَوِّرْ مَعَاذِيْر

 

أنَا فَقَطْ.. حَبَّيْت أعَايِدْ وَابَارِكْ

لا تِنْزِعِجْ مِنِّيْ وْلاَ تْضِيْق وِتْحِيْر

 

عِيْدِكْ مِبَارَكْ.. عِقُبْ يَوْم ٍ مبَارَكْ

وْ (كِلْ عَامْ وِانْت بْخَيْر).. لَوْ مَانِيْ بْخَيْر