وِرَايَةْ ضِلُوْع

سَكِّنُوْنِيْ في حُوِيْ بَيْتِهْ

                      بَسّ.. مَا لِيْ فِيْ الْعَرَبْ غَايِهْ

وِشْ بَلايه؟! قِلْت أنا مَيْتِهْ

                    حَالِةٍ فِيْ العمر مَنْهَايِه

ألْف بَابْ وْبَابْ صَكَّيْتِهْ

                   صَاحِبِيْ سَلَّمْتِهْ الرَّايِهْ

فِيْ شِبَابه لى تِمَنَّيْتِهْ

                 بَيْن خِلانْ الْهِوَى آيِهْ

شَيّ لِهْ فِيْ الْخَاطِرْ أخْفَيْتِهْ

                فَوْق وَصْف الْحِبّ مَعْنَايِهْ

مَا هَنَاهْ السَّاهِرْ مْبِيْتِهْ

                 جَرْح شَوْق وْنَفْس مَدْمَايِهْ

وِانْ عِنَيْت النَّاصِحْ وْيِيْتِهْ

                قَالْ مَا لِيْ فَـ.. امْرِكْ دْرَايِهْ

وَاشْعَلْ السَّارِيْ ضِيَا زَيْتِهْ

             مِنْ ضِلُوْعِيْ يَاخِذْ وْرَايِهْ

صَاحِبِيْ لاَ مَا تَهَنَّيْتِهْ

            إقْصِرَتْه أيَّامْ مَطْوَايِهْ

زَرْع وَرْدٍ في مَنَابِيْتِهْ

            اقْطِفَوْه وْقَالَوْا كْفَايِهْ

لَيْت لَوْ تِسْمَحْ مِوَاقِيْتِهْ

           عَ الْوَعَدْ نَفْسِيْ مْضَرَّايِهْ

وِدِّيْ أسْكِنْ فِيْ طَرَفْ بَيْتِهْ

          وَمَا عَرَفْت الْغَالِيْ إِشْ رَايِهْ؟!