دَمْعَةْ يِتِمْ

فِيْ كَنَفْ قِبْطَانْ... بَالِكْ مِسْتِرِيْح

                            رَغْم أنّ الْحَتْف (مِيْنَا) أوْ (مِنِيِّهْ)

صَاحْ حِذْرِكْ تَشْكِىْ الْهَمّ الْبِرِيْح!

                           دَامْ كِلْ امْرِكْ بِكَفْ رَبّ الْبِرِيِّهْ

السِّفِيْنِهْ... نَاقَةْ الْبَحْر الْفِسِيْح

                          مِثْلَمَا فِيْ الْبِيْد تَبْحِرْ بِكْ مِطِيِّهْ..!

لو يقوم الْيَاسْ.. وِحْظُوْظِكْ تِطِيْح

                          خَلّ شِعْلَةْ عَزم وِسْط الرُّوْح حَيِّهْ

يَا شِرَاعْ الصَّبر لَوْ تَطْوِيْك رِيْح

                        بِالشّمُوْخ آرَوِّضْ الرِّيْح العصيِّهْ

هُوْب أنا لَى تَكْرِمْ كْفُوْف الشِّحِيْح

                       وْهُوْب أنَا مِنْ تَجْزِيْ السَّيِّهْ بْسَيِّهْ

شِحْت أنَا بْوَجْهِيْ عَنْ الْوَجْه الْقِبِيْح

                      وَادْرِيْ فَرْق الْمَرْحَله... وِالْجَاهِلِيِّهْ

أكْتِبْ الْفَرْحه بَاحَاسِيْس الْجِرِيْح

                      وَانْجِرِحْ مِنْ دَمْعَةْ الْيِتْم الأسِيِّهْ

أكْتِبْ أحْيَانَاً بَاحَاسِيْس الذِّبِيْح

                      وْفِيْ بَعَضْ الاحْيَانْ تَكْتِبْنِيْ القضيِّهْ

شَاعِرِهْ... مَا جِيْت أعَبِّرْ وَاسْتِرِيْح

                       جِيْت أرِيْح اللَّى قَرَانِيْ بْحِسن نِيِّهْ