يَا الله عَسَى مِنْ يِدَوِّرْ طِيْب يَلْقَاه طِيْب

                            وِاللَّي يِدَوِّرْ رِدَى يا رَبّ تقْصِرْ مِدَاهْ

على المَرَاجِلْ نِزوع النَّفْس زَوْع الغريب

                            اللَّي يِدَوِّرْ بَيَاض الوَجْه عِنْد أخْوِيَاهْ

عِشْنا على حِبّ خَلْق الله بعيد وْقِرِيْب

                            وْما مَرْ يوم حِذَفْنَا مُوْدِمِيّ بْحصاه

واليوم ما فاد طول الصَّبْر حَتَّى الطّبِيْب

                           يالِعْنبو نَفْس ترضى الذِّلّ لو جاب جَاهْ

وآمالنا وَيْن ما راحَتْ تلاقي نصيب

                             عِنْد الّذي من تمَسَّك به يحَصِّلْ رجاه

والشَّمْس تَشْرِقْ حياه وْموتها بالمغيب

                         والإنسان تَكْتِبْ نهاياتِه ظروف الحياه

قَصَّافْ الآجال يا قِرْبه بعَيْن الرَّقِيْب

                         على المخاليق يُوْمِيْ كِلّ يَوْم بْعصَاه

العِزّ ناموس من يعْطِيْ.. ويِقْدَرْ يجيب

                          ما هوب مَن مَكَّنَه رَبّيْ وْشَحّ بْعطاه

ساعه من العِزّ يِغْنَمْهَا من الوقت ذِيْب

                         لو كان ما له سواها من سِمَانْ الحياه

وْساعه من الذِّلّ تحياها من العمر عَيْب

                         كَمْ تِرْفَعْ رْخُوْم لكِنْها توطِّيْ جِبَاهْ

يا رَبّ تجعل لفِعْل الطِّيْب فِيْنِيْ نِصِيْب

                        يا العادِلْ اللِّي رِضَى خَلْقه بمُحْكَمْ قضاه

ويا الله عَسَى مِنْ نِوَى بالطِّيْب تِجْزَاهْ طِيْب

                      واللَّي نِوَى بِالرِّدَى يا رَبّ يِلْقَى جِزَاهْ