النَّجْم الضَّاوِيْ

التَّهَانِيْ تِرْفَعْ لْحَضْرَةْ سِمُوّهْ
                          نادِرٍ حَوْمه عَلَى الْبِرْج السِّمَاوِيْ
لا اعْتِلَى قِبّ الْمَهَارْ تْزِيْد قُوّهْ
                          وْهُوْ عَلَى قَطْع الصَّعَايِبْ قَرْم قَاوِيْ
لا يِغِرِّكْ طِيْبه وْلَحْظَةْ هِدُوّهْ
                         مِنْ بَرَاكِيْن الْغضَبْ يَوْم الْبَلاوي
لا يِحِيْد وْلاَ يِمِيْد وْلاَ يِمَوِّهْ
                         وَاضِحٍ فِكْره شَرَاتْ النَّجم ضَاوِيْ
كَمْ فِقَارَى فِيْ الشِّتَا تِدْفَا بِضَوّهْ
                         وْكَم يِتَامَى فِيْ مِقِيْظ الْحَرّ يَاوِيْ
مِ السَّحَايِبْ مَاخِذٍ مِزْنِهْ وْنَوّهْ
                         لاَ هِطَلْ جُوْدِهْ مَلا كِلّ الرِّجَاوِيْ
وِانْ عِطَى رَايِهْ عَلَى فِكْره وْنَوّهْ
                         يَاخِذْ الْبَاقِيْن مِنْ رَايِهْ فِتَاوِيْ
عَالِمِيٍ فِيْ سِمَاتِهْ وْفِيْ عِلُوّه
                        وآدِمِيٍ فِيْ صِفَاتِهْ مَا يِرَاوِيْ
الْمَرَاجِلْ وِالشَّهَامه وِالْفِتُوّه
                        وِالْكَرَامه وِالْجِسَاره وِالْعِزَاوِيْ
كِلَّهَا (حَمْدَان) فِيْ دَاخِلْه جِوّهْ
                       لاَ ذِكَرْت أسْمِهْ (فَقَطْ).. أكْتِبْ يِسَاوِيْ

 

 

مهداة إلى سمو الشيخ حمدان بن محمد بن راشد آل مكتوم

ولي عهد دبي حفظه الله تعالى ورعاه بمناسبة فوزه بكأس محمد بن راشد للقدرة