مَا بَيْن لَيْل الوَجْد وِمْجَابه النُّوْر

                            يِحِيْط بَرْزَخْ فِيْه مليون ضِيْقه

آتَرْجِمه بَرْزَخْ أوْ حْجَابْ أو سور

                            أو انْهِيَارْ إنسان ضَيَّعْ طريقه

مَقْهُوْر وِالآتي.. تبَاريح مَقْهوور

                            لِقَى الْقَلَمْ مِثْل الرِّفِيْق وْرِفِيْقِهْ

ينادِمِهْ كِلْ ما الْوِجَعْ سَجَّلْ حْضُوْر

                          وْيَزْهَمِهْ كِلْ ما ظروفه تِعِيْقه

يِذِيْع ذَنْب وْشَيّ بالأمْس مَسْتُوْر

                          وفي تالي الْوِجْهِهْ تِجَلَّى بِرِيْقِهْ

مشاهِدٍ فيها الفِكِر لاعِبٍ دَوْر

                         حَسَّبْتِهَا نَامَتْ وْهِيْ مِسْتِفِيْقِهْ!!

واللى قَسَمْ بـِ (العَصْر) وِ(التِّيْن) وِ(الطُّوْرْ)

                         أيْضَاً وْخَرَّتْ له جِبَاهْ الْخِلِيْقِهْ

إنّ الرِّضَا نِعْمِهْ رَغَمْ سطوَة الجَوْر

                         وانا احْمِدِهْ في الثَّانيه وِالدِّقيقه

صحيح بَعْض الخَلْق لو قِيْل مَعْذُوْر

                           يسُوْق عِذْرٍ سامعه ما يطيقه

شَرَى الّذي لا من كِتَبْ بَيْت مَكْسُوْر

                          يِثْبِتْ خَطَا الإمْلا وْيَخْفِيْ الحقيقه!!