قَالْ مَنْ هُوْ عَلَى حَتْفه وِشِيْك
يا أمَانٍ.. أثَرْ مَا لِكْ أمَانْ..!!
كَيْف مَنْ عَلَّقْ آمَالِهْ عَلَيْك؟
تِتْرِكِهْ لِلْعِوَاذِلْ وِالزِّمَانْ..!!
وْكَيْف تِقْسَى عَلَى مَنْ مَاتْ فِيْك؟!!
وِانْت كِلِّكْ لِيَانٍ في لِيَانْ
لَيْت (لِيْن وْنِعُوْمَةْ) وَجْنِتَيْك
صَبَّها الله فْـ.. قَلْبِكْ لَيْن.. لاَنْ
وْلَيْتِكْ إلاَّ بِدَايِهْ.. وَانْتِهِيْك
وْلَيْتِكْ إِلاَّ خطا وْكَبْوَةْ حِصَانْ
وْلَيْت مَا لِيْ عِيُوْنٍ.. تِرْتِجِيْك
وْلَيْت مَا كَانْ لِعْيُوْنِيْ لِسَانْ..!
وْيَوْم طِحْت فْـ.. هِوَاكْ وْفِيْ يِدَيْك
لَيْت مَا اطْلَقْت لاِحْسَاسِيْ عَنَانْ
كِنْت أظِنِّكْ عِمِرْ يَوْم أصْطِفِيْك
وَاثْر مَا انْتِهْ كَفُوْ (حِبّ وْحَنَانْ)
حَانْ يَوْم اللِّقَا وْجِيْت ألْتِقِيْك
لَيْت يَوْم اللِّقَا مَا كَانْ حَانْ
رَاهَنْ الْقَلْب وَاكَّدْ لِيْ مِجِيْك
وْيَا حِسَافِهْ خِسَرْ قَلْبِيْ الرِّهَانْ
بِعْت قَلْبٍ بِدَمِّهْ مِشْتِرِيْك
وِالْمَعَاذِيْر مَا كَانَتْ سِمَانْ
لَوّ شَوْق ابْتَلانِيْ.. مِبْتِيِيْك
كان سَابَقْتِنِيْ لْذَاكْ الْمِكَانْ
مِتّ مِنِّكْ.. بَعَدْ مَا مِتّ فِيْك..!!
يَا قِسَاتِكْ يَا عُوْد الْخَيْزَرَانْ
رَاحْ ثِلْثَيْن لَيْلِيْ.. أحْتِرِيْك
وِالْقُمَرْ حِيْنَهَا.. شَاهِدْ عَيَانْ
ذَابْ قَلْبِيْ مِنْ اللَّهْفه عَلَيْك
كَنِّهْ الشَّمْع فَوْق الشَّمْعدان