رَاجَعْ تِصَحِّيْ في فوادي حنينه
هُوْ نَامْ أصْلاً لاجل تِرْجَعْ تِصَحِّيْه؟!
لو تَفْقِدِكْ عَيْنِيْ أشُوفِكْ بعينه
وان ما قِدَرْت ألْقَاكْ.. دَوَّرْت لِكْ فِيْه
يا كِلّ ذاك العمر وَاحْلَى سِنِيْنِهْ
هَالْقَلْب عِمْره مَا جَرَحْك بْتِجَافِيْه
أدْرِيْ يحول الْوَقْت بَيْنِكْ وْبَيْنِهْ
لكن ولو يقسى الزِّمَنْ مَا يِقَسِّيْه
ما خان حِبِّكْ وِانْت باقي ضِنِيْنِهْ
وِانْت اجْمَلْ أحْلامه وْأغْلَى أمَانِيْه
إرْجَعْ.. وْقَلْبِكْ فِيْ اليدين الأمِيْنِهْ
حِطّه بكَفِّيْ وِاتْرِكِهْ.. لا تِحَاتِيْه
لا تْقُوْل لِيْ: (سَمِّيْ قَبِلْ تَذْبِحِيْنِهْ)
أنَا حبيبي عايشه.. مَيِّتِهْ فِيْه!
وَيْن الزِّمَانْ اللَّى حِضَنَّا يِدَيْنِهْ؟
وَيْن المكان اللَّى ضِوَيْنَا لِيَالِيْه؟
تَعَالْ نَعْطِيْ الْبَحْر حَبْل السّفينه
نَبْحِرْ عَلَى مَوْجه وْنِنْسَى مِوَانِيْه
وِاشْطِبْ مَلامِحْ ذَاكِرَتْك الحزينه
قَلْبٍ مَلَكْتِهْ لا تِرِدِّهْ لرَاعِيْه
مَا شَيْ يِنَيِّمْ-غير شوفك- حنينه
وِانْ نَامْ مَا شَيْ- غَيْر صَوْتِكْ - يِصَحِّيْه