بشارة

نزِفّ البشاير لاِصْدِقَانَا وْلِلْخِلان

لكِلّ الذي يفْرَحْ لنا والفَرَحْ زاده

رِزَقْنا الإله العالي الواهِبْ المَنّان

صِبِيّ وْتعَلَّتْ صيحته تَعْلِنْ أمجاده

أخو (راشد) وْ يَدِّهْ بَعَدْ (راشد) ونيشان

لكلّ اصْدقاه.. وْمن يِدَاخِلْه واحفاده

وابوه الذي رَبّاه (راشِدْ) وْفِعْلِهْ زان

على دَرْب من قَدّاه لِلدَّرْب واعتاده

سليل الْمَرَايِلْ والفَخَر للأدَبْ عِنْوان

عَسَى الله يبيِّض صَفْحِتِهْ يوم مِيْعَاده

وعَسَى الطَّارِشْ اللى بَشّروا به كثير إيمان

كثير الصَّلاه وْعابِدْ وْيحْفَظ بْلاده

ضِوَى لابِتِهْ (بالعبْد)وِ(مْعيلي) ولا هان

(بن المر) وِعْروقٍ تسَاِقيْه وَاجْدَاده

ولا هان من يِقْرَا وَلا هانوا العربان

نحَفْظ القَدِرْ لِلَّى يِقَدِّرْه وِزْيَاده

تنَقَّيْت له بين الأسامي أسِمْ (سلطان)

عَسَى انّه على من هو يساميه وِسْناده

على يَدِّهْ الثَّاني تسَمّى كبير الشَّان

وانا اخْتِرْت يَدِّهْ من قَبِلْ ينْبِضْ فْواده

تنقَّيْت من سوق المَرَايِلْ كبير احسان

به الْمَدْح يزهى والوَلَدْ يكْمِلْ عْتاده

له اليَدّ يَدّ وْخاله الخال والميزان

عليم الله انه مِعْتِدِلْ كَفّ عَدّاده

عَسَى (راشد) وْ(سلطان) في مِخْتَلَفْ الازْمَان

عضيد وْعضيد وْللنواميس صَيَّاده

عَسَى لو تغَرَّبْ عَنْهُمْ الفِلْس والنِّيْطَانْ

يواطِن أدبهم في سما العِزّ والسَّاده

عَسَى اللى مسَمِّي يطلَعْ الفايز الرَّبْحَان

جمَع هامتين العِزّ وِالنَّار وَقَّاده

وعَسَى اللَّى توصَّفْ ما طَلَعْ بِالْمِثَلْ غَلْطان

عن الْحَبّ وِبْذوره وعن دَفْعَةْ أقْصاده

وْعَسَى رَبّنا اللَّى حافظ الدِّيْن والقرآن

عليهم حفيظ وْمِنْعِمْ وْرَاحِمْ عْباده

لِهْ الحَمْد رَبّي خالِقْ الإنْس وِيَّا الجان

عدَدْ مَا سِجَدْ له مِسْلِمْ وْعَيَّدْ أعْيَاده