لِلْعِيْد فَرْحه وِانْتِظَارْ وْعَلاَمَاتْ

وْلِلشِّعر لَذِّهْ لا حضَر فِيْ طَرَاته

 

الله يِدِيْم أعْيَادكم يَا (الإمَارَاتْ)

يَا كَاسِبِيْن الْمَجْد وَارْبَعْ جِهَاته

 

هَامَاتكم دَايِمْ عَلَى كِلّ هَامَاتْ

مِتْوَارِثِيْنْ الطِّيْب وَابْرَزْ صِفَاته

 

لازال (زَايِدْ) حَيّ لَوْ كَانْ قِدْ مَاتْ

مَادَامْ بِيْدَيْكُمْ نِشُوْف أمْنِيَاته

 

تِجَاوَزْ أهْل الفلسفه والطِّمُوْحَاتْ

وِانْتُمْ تِوَارَثْتُوْا تَعَبْ مِنْجِزَاتِهْ

 

دَايِمْ حديثه عَنْ بِنَاءْ الْحَضَارَاتْ

مَا يَسْكِتْ إلاَّ لاَ وِقَفْ فِيْ صَلاتِهْ

 

يِنَاجِيْ الْمَوْلَى مِنْ الْخَوْف بِسْكَاتْ

يَطْلِبْ رِضَاهْ وْرَحْمِتِهْ وِحْسِنَاتِهْ

 

بَيْنِهْ وْبَيْن مْنَافِسِيْنِهْ مِسَافَاتْ

عَلَّقْ عَلَى نَجمْ (الثِّرَيَّا) عباته

 

بدايته تَلْغِيْ جميع النَّهَايَاتْ

وِنْهَايته يِبْدَا بها مِعْجِزَاتِهْ

 

مَحْدٍ مِثِلْ (زايد) عَلَى فِعلِهْ إثْبَاتْ

وْلا فِيْه أحَدْ مِثْلِهْ يِسَوِّيْ سِوَاتِهْ

 

إِلاَّ عِيَالِهْ كاسبين البطولات

تَعَلِّمَوْا دَرْس الْفَخَرْ مِنْ وِصَاتِهْ

 

سَارَوْا عَلَى نَهْجِهْ بِشَتَّى الْمِجَالاَتْ

مَا كَنِّهْ إِلاَّ بَاقِي ٍ فِيْ حياته

 

يِبْقَى الْعَلَمْ يِكْفَخْ عَلَى سَبْع رَايَاتْ

وْيَمْنَى (خِلِيْفِهْ) تِرْفَعِهْ عَنْ وِطَاتِهْ

 

لَوْ كَانْ حِلْم الدَّارْ بِعْد الْمِجَرَّاتْ

يقُوْل يَا (مْحَمَّدْ): تِفَضَّلْ وْهَاتِهْ

 

دَايِمْ وَ(ابُوْ خَالِدْ) زِبُوْن الْمِهِمَّاتْ

مْطَوِّعْ الصِّعْبَاتْ مِنْ قُوّ ذَاتِهْ

 

ثِقِيْل مَا يِحْسِبْ حِسَابْ الثِّقِيْلاتْ

يِشِيْلها مَا شَالْ هَمّ بْحياته

 

سَاطِيْ عَلَى الْكَايِدْ وْفِيْ كِلّ الاوْقَاتْ

كَفِّهْ نِدِيْ يَسْمُوْ وْتَسْمُوْ سِمَاتِهْ

 

نَهْرٍ وْيَغْرِقْ بِالْعِذُوْبه مِحِيْطَاتْ

مِنْ (دِجْلِتِهْ) صَبّ الْكَرَمْ فِيْ (فِرَاتِهْ)

 

وِالشَّعْب يِبْقَى فِيْ نَعِيْم وْمِسَرَّاتْ

فِيْ ظِلّ سَادَاتْ الْبِلادْ وْثِقَاتِهْ

 

(عِيَالْ زَايِدْ) كِلّهم شَاهِدْ إثْبَاتْ

عَلَى صِعُوْد الْمَجْد وَارْبَعْ جِهَاتِهْ