فِيْ يَوْم تَخْلِيْد الأسَامِيْ وِالافْعَالْ
للشِّعر وَقْفه وِالْمِوَاقِفْ كِبِيْرِهْ
الشِّعر دِيْوَانْ الْمِفَاخِرْ وِالاحْوَالْ
صَوْت الْعَرَبْ فِيْ أرْض شِبْه الجزيره
فِيْ يَوْم تاريخه يِخَلَّدْ لِلاجْيَالْ
وْيِلْبَسْ مِنْ بْشُوْت الْمِكَارِمْ حريره
وِالشَّعْب وَقْفَةْ عِزّْ يِوْقَفْ لِلابْطَالْ
وْيَهْدِيْ مِنْ التَّعْبِيْر أجْمَلْ عبيره
يَوْم الشَّهِيْد اللَّى نِكَرِّمْ بِهْ رْجَالْ
لَبَّوْا النِّدَا وَاوْقَفْوا بعَهْد المسيره
مَا دَوِّرَوْا كَسْب الْمَغَانِمْ والانفال
وْلا اختاروا إلاَّ قِمَّةْ الْمَجْد خِيْرِهْ
ضَحَّوْا بأرْوَاحٍ تِجَلَّتْ بِالاعْمَالْ
تِبْقَى عَلَى مَرّ اللِّيَالِيْ منيره
حَقّ الشَّعِبْ يِوْقَفْ لَهُمْ قَدِرْ وِاجْلالْ
وْمِنْ حَقّ أهَلْهُمْ لا افْخَرَوْا فِيْ الْعِشِيْرِهْ
دَمّ الشَّهِيْد اللَّى بِأرْض الْوَغَى سَالْ
فِيْ الدَّارْ نَكْتِبْ بِهْ مِنْ الفخر سِيْرِهْ
هذا الثَّرَى نَفْدِيْه بِالنَّفْس وِالْمَالْ
وَارْوَاحنا عِنْد الشِّدَايِدْ ذِخِيْرِهْ
وَقْفَاتْهُمْ مِنْ عِزَّهَا الْعِزّ يِخْتَالْ
فِيْ ظِلّ (أبُوْ سِلْطًانْ) وِالْخَيْر خَيْرِهْ
فِيْ دَرْب (زَايِدْ) سَارَوْا بْكِلْ مِنْوَالْ
النَّاسْ تِشْهَدْ وِالدَّلايِلْ كِثِيْرِهْ
هذا الوْطِنْ كَلِّهْ عَلَى قَلْب رَجَّالْ
هذا الّذي عَزّهْ وْوَحَّدْ مِصِيْرِهْ
شِفْ كَيْف زَارْ شْيُوْخنا كِلّ مِنْزَالْ
دَقّ الْحِزِنْ بَابِهْ وْيَتَّمْ صِغِيْرِهْ
(بُوْ رَاشِدْ) يْزُوْره وْيَنْشِدْ عَنْ الْحَالْ
وْ(بُوْ خَالِدْ) بْنَفْسِهْ يِوَاسِيْ كِبِيْرِهْ
كأنّهم لامّ الشِّهِيْد أمْسَوْا عْيَالْ
تِفْرَحْ بِهُمْ مِنْ عِقْب دَمْعه غِزِيْرِهْ
حَتّى الصِّوِيْب اللَّى شِكَا ضَيْم وَاهْوَالْ
عَوَّدْ مِثِلْ سَيْفٍ فعوله خِطِيْرِهْ
هذا التَّلاحِمْ فِعْل ما هو بِالاقْوَالْ
وْهالطِّيْب هُوْ جَبْر الْعِظَامْ الْكِسِيْرِهْ
هذا وِطَنَّا.. كِلِّنَا دُوْنِهْ جْبَالْ
وِدْرُوْب عِزِّهْ لِلْمَعَادِيْ عِسِيْرِهْ
نَبْنِيْه بِالإخْلاصْ وِنْحَقِّقْ آمَالْ
وِنْذُوْد دُوْنِهْ بِالْخِيُوْل الْمِغِيْرِهْ
وِنْخَلِّدْ وْسَامْ الشَّهَادِهْ لِلاجْيَالْ
بِاسْم الدِّمَاءْ الطَّاهره فِيْ الْمِسِيْره
وْيَوْم الشِّهِيْد يْتَرْجِمِه صِدْق مِنْ قَالْ
عِيَالْ (زَايِدْ) لِلْمِوَاقِفْ ذِخِيْرِهْ