مَا شِفْتِنِيْ مِنْ داعي الْبِعْد مَيْهُوْد
وَاسْلِكْ طريق (العين) وآعِدّ الايَّامْ
اْلاوَّلْ أدِلّ الدَّرْب وَآيِيْه مَقْصُوْد
واليوم قلبي طاح حَظّهْ وْ لا قَامْ
قِدْ لي ثلاث سْنِيْن أوْصَلْه وآعُوْد
وَاخْطِفْ جِدَا داره مسَيِّرْ مِنْ أعْوَامْ
بَاسْبَابْ مِنْ حَكَّمْ عَلَى قَلْبي قْيُوْد
واقْفَى وهو ما نَاصِفِنِّيْ بِالاحْكَامْ
على كِثِرْ ما خاطري صَيَّحْ بْهَوْد
وَنَّةْ هِدَاه تْزُوْرني كِلْ ما انام
وِالضِّحْك فِينْي له قوانين وِبْنُوْد
أدْفَعْ تكاليفه سِنَةْ هَمّ قِدَّامْ
لَوْ مَا أخَافْ الله وْتَحْكِمْنِيْ حْدُوْد
وِتْرِدِّني الْفِطْره على دِيْن الاِسْلام
بَاثَوِّرْ فْـ..رَاسِيْ وْخَلْق الله رْقُوْد
وَاتْصَدَّرْ أخْبَارْ الْجَرَايِدْ والاِعْلامْ
وآخَلِّفْ أشْيَا ما لَهَا ذِكْر مَحْمُوْد
لانِّيْ ضِحِيَّةْ حِبّ مَحْكُوْم بِاعْدَامْ
يا ليت ما قالوا لي الدَّمْع مَنْقُوْد
يوم اسْتِحَيْت وْجَرَّحْ الدَّمْع الاكْمَامْ
حَتّى عَلَى دَمْعِيْ حِرِمْ لَمْس اْلِخْدُوْد
واحْلامنا ماتَتْ على ضِفّ الآلام
رَشّ السِّحَابْ اللّى عَلَى قَلْبي يْجُوْد
أثْمَرْ بحِبّه يَوْم فِيْه الزِّمَنْ ضَامْ
إسْمٍ من ارْبَعْ لَوَّنْ أيَّامِيْ السُّوْد
كِنْت اليتيم وكان لي كافِلْ أيْتَامْ
كم فاح ذِكْره في ضلوعي دِهِنْ عُوْد
فِيْ كِلّ ضِلْع ٍ لهْ مِنْ الْعِزّه أخْتَامْ
قَلْبِيْ أسِيْر وْصَفَّةْ ضْلُوْعِيْ جْنُوْد
يومه تِمَرَّدْ ما حِفَلْ قَوْل لُوَّامْ
عن عِزّتي تِوْقَفْ مواقيفي حْشُوْد
غَيْره عَلَى مِثْلي يعِضّون الابهام
رِفَعْت راسي وِالْمَعَالِيْ لي شْهُوْد
حِبّ الأكابِرْ ما اتِّخَازَى بِهْ أقْوَامْ
لو ينحني ظَهْرِيْ بالاقيه مَشْدُوْد
وَآيِيْه مِتْعَكِّزْ عَلَى رزْمَةْ عْظَامْ
عَلَى طِرِيْق (العين) آوِنّ وَآنُوْد
آروح له وآعود قِدْ لي كذا عام
عَلَى طِرِيْق (العين) لو صِرْت مَفْقُوْد
قولوا له انّ الْبِعْد خَلاّني حْطام
عَلَى طِرِيْق (العين) هالدَّرْب مَسْدُوْد
أسْتَخْدِمْ دْرُوْب ٍ بديلات قِدَّامْ
حادِثْ مُرِيْع وْجِسْم رَاعِيْه مَمْدُوْد
وْقِدْ شِيْع بانِّهْ رَاحْ لِلْمَوْت بَاقْدَامْ
مَرَّتْ سنين العمر وَاهْدَتْني لْحُوْد
لين استحيت آرِدّ مَدَّاتْ الايَّامْ
لَوْ تِتْلَفْ عْظَامي وْيَاكِلْني الدُّوْد
تِبْقَى مَحَبَّتْنَا عَلَى صَدْرِيْ وْسَامْ
على الأقَلْ لَوْ كِنْت فِيْ القَبْر مَوْجُوْد
بَاحِسّ بِهْ يُوْطَى تِرَابِيْ بِالاقْدَامْ