إِنْت فِتْنِهْ وَلاَ كِلّ الْفِتَنْ فِيْ الزِّمَانْ

مِنْ مِفَاتِنْك مَفْتُوْنِهْ بِكْ الْمِنْظَره..!!

 

زِدّ كِلّ الْبَنَاْت الْخِرِّدَاتْ الْحِسَانْ

تِنْتِظِرْ مِنْظَرَتْك وْصُوْلِكْ وْتَشْكِره

 

جِنَّتْ عْقُوْلنا وْشَيَّبْت مِنَّا عَيَانْ..!!

مِنْ جَمَال ٍ تَعَالَى وْجَلّ مَنْ صَوَّره

 

أحْرَجْ (الْبَانْ) قَدِّكْ وَاخْجَلْ (الْخَيْزَرَانْ)

وْلاَ بَعَدْ شَابَهَتْ لِكْ فِيْ الْجِمُوْح مْهَرَهْ

 

مَا خِذَتْ غَيْر مِنْ تَالِيْك بِنْت الْحِصَانْ

وِاعْرِضَتْ بِالشِّلِيْل الْمِذْهِلْ مْضَمَّره

 

ما تِبَى لِكْ (سِيُوْف) وْ لاَ تِبَى لِكْ (سِنَانْ)

فِيْ يِدَيْنِكْ قِلُوْب الْعَاشِقِيْن شْعَره

 

مِنْ كَلامِكْ يِغَاْر (النَّدّ) وِ(الْقِحْوِيَانْ)

مِنْ عِسَلْه ارْتِشَفْت وْذِبْت فِيْ سِكَّره..!!

 

قَبْل لا اسْمَعْك مَحَّدْ سِمْع هَمْس (الْجُمَانْ)

إلاَّ انَا مِنْك حِيْن أسْمَعْتِنِيْ نِدَّره

 

حِزْت كِلّ الْعِذُوْبه عَنْ عِذَابْ الثِّمَانْ

رَمْسِتِكْ آسِره بَانْفَاسِكْ مْعَطَّره

 

مِنْ عبِيْر الْعِبَاره وْلِطْف نِطْق اللِّسَانْ

كَنِّكْ إِلاَّ تِفِتّ الْمِسْك وِتْبَعْثِره..!!

 

يُوْقَفْ.. وْيِنْحِنِيْ لكْ قَدِرْ.. (سِحْر الْبَيَانْ)

يَوْم شَوْقِكْ عَلَى سَمْعِيْ شِعِرْ تَنْثِره

 

أسْكَنْ الله مَنْ جَابِكْ رِيَاضْ الْجِنَانْ

مَا عِرِفْت شْجَره آلَذّ مِنْك ثْمَره