حروف غَلا

مِسَارِيْ الْغَلا تِشْرَهْ على بَارِدْ النِّسْنَاسْ

وموج البَحَرْ يشْرَه على غَيْبَةْ الْقَمْرَا

 

سَرَى اللَّيْل وِالْمَعْنَى عَلَى صَهْوَةْ الْهَوْجَاسْ

تِسَرّيْ حروف ٍ لِلْغَلا تِسْمَعْ وْتِقْرَا

 

لذلك يجي لك قاف مِفْعَمْ مِنْ الإحساس

على اعْذَبْ وَتَرْ اْلاشْوَاقْ يستَطْرِبْ الْمِسْرَى

 

جنون الْغَلا يِشْرَه على الحِبْر والقرطاس

وعَذْب الْمِشَاعِرْ بَيْنَهَا عَيِّنَتْ مِذْرَى

 

تِفِيْض وْتِهِيْض قْلوب من دونها حِرَّاس

على نايحات الوَرْق تِلْقَى لها مِجْرَى

 

تغذّي ورودٍ يانعاتٍ لَحَقْهَا يْبَاس

عسَاهَا تثمِّنْ وَقْفةٍ تنْعِشْ الذِّكْرَى

 

غياب وْعِتَابْ وسَجّ فِكْر ٍ من الجِلاَّس

ولا به سواك اللَّي على الْبَالْ هُوْ يطْرَى

 

لك الشَّوْق لو طال الجفا ما لَحَقْه نْعَاسْ

وْلِكْ ضْلوع صدري فدوة ٍ لك وَلو يِفْرَى

 

عليك السلام ورحمة الله يا اعَزّ النَّاس

تحيّة غَلا يَسْرِيْ بها الشَّوْق وِانْت أدْرَى

 

تِقَبِّلْ جِبِيْنِكْ بَيْن مَقْرُوْنةْ الأقواس

وْتَهْدِيْك مِنْ وَرْد الْغَلا وَرْدِةٍ حَمْرَا