عِشّ الْوَرَقْ..!!

مَخْنُوْق.. أدَوِّرْ (مرحله) تِشْبَهْ كْثِيْر

زعْم (البياض) اللِّي عَلَى كِلّ الالوان

 

الصُّوْره اللَّي في دَمِيْ سَيِّلَتْ خَيْر

حَتَّى غدا بِرْوَازها ضَيّ.. وِجْنان

 

ذات الصَّبر.. ما جَدَّدْ بْدَفْتري غير

حِرْمَانْ.. يحْفِرْ داخلي قبر حِرْمَانْ

 

(جملة) حياة.. يخونها بعض (تعبير)!

لولا (الْمَلامِحْ)، صارت لْضِيْقِيْ (لْسَانْ)

 

مِنْ وَيْن تبدا قِصِّتي.. وَايّ تغيير؟

والناس تِتْغَيَّرْ.. وانا وحدي (إنسان)!

 

وابن الخيال يْطِيْر.. وِيْطِيْر.. وِيْطِيْر..

وْبِنْت الخيال (مْرايه) وبوح (فِسْتَانْ)

 

نَرْكِضْ وَرَا التَّخْمِيْن.. وِنْرَدِّدْ (يْصِيْر)

ونبرهن اللَّى (صار) من دون برهان

 

 

نبني لنا فَوْق الْوَرَقْ (عِشٍ صْغِيْر)

ونختار من (نوت الْقَلَقْ) عَذْب الالحان

 

أجْمَلْ شعور تْعِيْشه (بْدون تفسير)

اللَّي (يكون) ولا عَرَفْ ذِلّ ما (كان)

 

وآخر زمَنْ.. يظهر مع الجهل تنوير

ولاعاد يبقى (عَبْد) في ظِلّ (سِلْطان)

 

غَارَوْا كثير مْن الْوِجَعْ.. كيف ما آغِيْر

وانا وِجَعْ صَمْتي غَلَبْ كِلّ الاركان

 

يا شِيْنها لا صِرْت تِحْتَاجْ (تبرير)

وَاقْرَبْ قريب يْفَسِّرِكْ (صَوْت غَلْطان)

 

وِتْنَادِي لْـ(غيمه) قَبِلْ فَزَّةْ (الطَّيْر)

تَهْدِيْك تَذْكِرْة السِّفَرْ.. روح وِجْدان

 

تمْسِكْ ما بين أصَابِعِكْ عمر تقصير..

تعصر جمود عْتَابِكْ لْكِلّ بسْتان!

 

لَعَلّ (بذرة روحك) تْصِيْر (تصوير)

وآخر بياض تْصِبّه فْـ.. كاس الالوان