عَلَى الْخَايِعْ الشَّرْقِيْ تحَيِّهْ وْسَلامٍ حار

رِفَعْتِهْ وَانَا اصُوْغه عَلَى شِعْرِيْ وْذَوْقه

رِفَعْتِهْ وَانَا مِسْتَوْحِشْ أهْل الْبَلَدْ وِالدَّار

وْلاَ لِيْ سِوَى ذِكْرِهْ وْلاَ لِيْ سِوَى شَوْقه

سَلامي عَلَى اللَّى شَبّ بَاقْصَى الضِّمَايِرْ نَار

أحِبّ الثَّرَى مِنْ وَيْن رِجْلِهْ وِطَتْ فَوْقه..!!

ْ

رِيْمٍ إذَا دَاعَبْه شَرْتَى النِّسِيْم آغَارْ..!!

يِشِلّ الْغَلا مِنْ خَافِيْ الْقَلْب وِيْبُوْقه

أبَى.. وَاشْكِيْ لِهْ.. وَابَى مِنْ جِدَاهْ أخْبَار

وَابَى انْدِبْ مِنْ الْهِجْرَانْ حَظٍ كِسَدْ سُوْقه

ْ

وْحَالِيْ مِنْ اوَّلْ شَهْر (تِشْرِيْن) لَيْن (آيَارْ)

شَرَى حَالْ مَنْ يَنْطِرْ حِيَا الصَّيْف وِبْرُوْقه

تِقَهْوَيْت مِنْ كَفّ الزِّمَنْ لَيْن جَرْحِيْ صَار

يِصِبّ الألَمْ وَانَا ارْجَعْ آخَيِّطْ فْتُوْقه

ْ

وِجُوْدِيْ عَلَيْهُمْ وَجْد مَنْ شَطِّتِهْ الاقْدَار

تِنَايَتْ مِطَالِيْبِهْ وْلاَ حَصَّلْ حْقُوْقه

ْ

إذا عَايَنْ الْمَاضِيْ يِشُوْف الْجِرُوْح كْبَار

وِاذَا عَايَنْ الْحَاضِرْ مَعَانِيْه مَسْرُوْقه

ْ

سَلامي عَلَيْهُمْ جَاوَزْ الألْف وِالْمِلْيَار

سَلامٍ يِبَرْهِنْ حَالَةْ الْخَافِقْ وْعَوْقهْ