الله عَلَى مَزْحِتِهْ وَالله عَلَى جَدِّه

يْذُوْب فِيْه الْغِرِيْم وْخَاطِرِهْ رَاضِيْ..!!

ْ

رَاعِيْ ابْتِسَامِهْ تِبِيْد الْحَيْل وِتْهِدِّهْ

فِيْه التِّبَرِّجْ دَلَعْ مِنْ سَالِفٍ مَاضِيْ

إنْ صَدّ وَاغْضَى بعَيْنِهْ تِهْت فِيْ صَدِّه

وْفِيْ سِحِرْ عَيْنِهْ عَذَابْ وْمَوْت الالْحَاظِيْ

ْ

كَنّ (الْكِرِسْتَالْ) يَبْرِقْ مِنْ سَنَا خَدِّه

فِيْ وَجْنِتَيْنِهْ شِعَاعْ الشَّمْس لِيْ يَاضِيْ

ْ

لِيَانْ عُوْدِهْ تِمَايَلْ وِاعْتِزَلْ قَدِّه

غِصْنٍ لَعَبْ بِهْ هِوَا وِفْنُوْنِهْ غْضَاضِيْ

ْ

إذَا تِخَطَّرْ يِبِيْح الْمِهْتِوِيْ سَدِّه

كَنّ خْطِوَاتِهْ يِخَطِّنْ فَوْق رَبَّاضِيْ

ْ

رُوْحِيْ تِحِبِّهْ وْذَابَتْ فِيْ هِوَى وِدِّه

وَانَا مْعَنَّى قِتِيْل الْجَارِحْ الْمَاضِيْ

ْ

أسْرَحْ بِفِكْرِيْ مَعَاهْ وْلا اقْدَرْ آرِدِّهْ

قِصَّةْ غَرَامه قِضَتْ بِيْ وَالله الْقَاضِيْ

الله يِسَامِحْ غَلاه إنْ حَدِّنِيْ حَدِّهْ

الدَّمْع فَاضِيْ وْضَاقْ الْوَاسِعْ الْفَاضِيْ

يَا طُوْل صَبْرِيْ عَلَيْه وْمَا اطْوَلْ الْمِدِّه

بِالْفِعْل أنَا فِيْه لاَ ابَدِّلْ وْلاَ اعْتَاضِيْْ