صَدِّقْنِيْ الْوِحْدِهْ أجْمَلْ شَيّ.. خَلِّكْ وِحِيْد
وِاظْهَرْ كَمَا هْلاَلْ عِيْد الفطر عِقْب الْبِطَا
وْلَمَّا عَنْ الْعَالَمْ الثِّرْثَارْ.. تِبْقَى بِعِيْد
لاَ تَخْطِيْ الْفَهم وِالاَّ يَفْهِمُونِكْ خطا
فِيْ شِعْبِةٍ غَرْب (وَادِيْ ضَنْك) مِنْ كِلّ صَيْد
هذاك مِرْتَعْ حِبَارَى.. وْذَاكْ مِرْبَى قِطَا
وِسْلاح مَا هُوْ مْصَرَّحْ، وِرْث جَدِّيْ (سعيد)
بِالْمِخْتَصَرْ.. لاَ يِبَاعْ وْلاَ لاحَدْ يِنْعِطَى
البيئه تْعِيْلنا وِالنَّاسْ مَحَّدْ يِحِيْد
إِلا هَلْ الدَّار.. وَاهْل الدَّارْ سِتْر وْغِطَا
وْرَاسِيْ مِنْ الْكَيْف وِالْمِقْيَالْ، جِدَّاً سعيد
وِ(اخْوَانْ شَمَّا) مَعِيْ.. مَا بَيْن أخْذ وْعِطَا
مَا عِنْدِيْ ارْسَالْ وِ(الْجَوَّالْ) تَارِسْ رصيد
خَارِجْ (نِطَاقْ الْحِزِنْ) وِالْفَرْح نَجْمه سِطَا
وِانْ قِلْت: فَرْقَايْ عِيْد آقُوْل: فَرْقَاكْ عِيْد
مِنْ يَوْم رَبِّيْ خَلَقْنِيْ.. مَا أنَاظِرْ وِطَى!
وِاللَّى يِبَانَا يِجِيْنَا مَا مَعَانَا بَرِيْد
يَا يِهْتِدِيْ بِالنِّجُوْم أوْ يِهْتِدِيْ بِالْخِطَى
وْيَبْشِرْ بِمَا أنْعَمْ اللّه مِنْ حَلاَلْ وْقِصِيْد
مِنْ قَوْم تَعْطِيْ الْجِزَالْ وْلاَ تِدَوِّرْ عِطَا
دَامِيْ عَنْ الْعَالَمْ الثِّرْثَارْ جِدَّاً بعيد
لاَ أخْطِيْ الْفَهم وِالاَّ يفهموني خطا