حِلْم الْعِمِرْ

أشْتَاقْ لِهْ شَوْق الوطَنْ لِمْسَافِرِيْن

شَوْق الشَّمِسْ لا عَانِقَتْ صَدْر الْفَجِرْ

 

وَاحْتَاجْ لِهْ حَاجَةْ قِمَرْ لِلْعَاشِقِيْن

اللَّي غَزَلْهُمْ رَاقْ بِهْ جَوّ السَّهَرْ

 

شِعْرِيْ بدونه ذَابِلْ وْحَرْفه حزين

أصْلاً بدونه تِحْتِضِرْ رُوْح الشِّعِرْ

 

تَخْنِقْ حِرُوْفِيْ غَصَّةْ السِّتّ السِّنِيْن

أبْكِيْ وْيِمْسَحْ دَمْعِتِيْ هذا الْحِبِرْ

 

خَلْ نَفْتِرِقْ بَسْ نِفْتِرِقْ مِتْعَاهِدِيْن

أنّ النَّحَلْ مَا فَارَقْ أحْضَانْ الزَّهَرْ

 

وَانّ الوفا فِيْ دَاخِلْ أعْمَاقِيْ دِفِيْن

مِثْل الْوِفَا بَيْن الكتابه وِالْمِطَرْ

 

وِانِّيْ بدونك مَا أبَى للشَّوْف عَيْن

كِلّ الْبِشَرْ مَا تَسْتِحِقْ لَفْتَةْ نِظَرْ..!!

 

خَلْ نَفْتِرِقْ بَسْ نَفْتِرِقْ مِتْوَادِعِيْن

إمْنَحْ شِعُوْرِيْ نِقْطةٍ بآخر سَطِرْ

 

وَانْهِيْ الْوَصِل فِيْ كِلْمِةٍ أوْ كِلْمِتَيْن

وِاطْلِبْ وِصَالِيْ مِنْ أجِلْ أسْخَفْ عِذِرْ

 

وِاحْضِنْ ضِلُوْعِيْ وْخَلِّنَا مِتْعَانِقِيْن

دام الأمر بِنْسَلِّمِهْ بِيْد الْقِدَرْ

 

وِانْ طَاحْ دَمْعِيْ فَايِضٍ مِنْ غَيْمِتَيْن

إعْذِرْ دِمُوْعٍ ما تحَمَّلْهَا الصَّبِرْ

 

وِاعْذِرْ أمَانِيْ تَغْزِلِكْ عِشْق وْحنين

وِاعْذِرْ خِفُوْقٍ كِنْت لِهْ (حِلْم الْعِمِرْ)