اجْتِيَاحْ

يِبِيْن.. حِبِّيْ لَوْ بَاخَبِّيْه

يِجْتَاحِنِيْ نَايِمْ وْوَاعِيْ

 

ذَاكْ الْعِدِيْم اللَّى أرَاعِيْه

إسْمِهْ وِسِطْ رُوْحِيْ رِبَاعِيْ

 

يِلْعَبْ بِقَلْبِيْ بْرَاحَةْ يْدَيْه

فِيْه.. اهْتِمَامِيْ وِالْمِسَاعِيْ

 

آحَاوِلْ أتْمَادَى.. وَاخَفِّيْه

وَارْجَعْ لِعَيْنِهْ بِانْصِيَاعِيْ

 

قَلْبِيْ يِهَوْجِسْ بِهْ وْيَطْرِيْه

وِيْشِدّ.. فِكْرِيْ.. وِانْدِفَاعِيْ

 

وَصْفِيْ وْحَرْفِيْ مَا يِكَفِّيْه

فَاقْ بْمِزَايَاهْ الرِّفَاعِيْ

 

مَزْيُوْن مَا لِهْ من يِضَاهِيْه

وِالْوَرْد فِيْ خَدَّيْه فَاعِيْ

 

مَرْفُوْق قَلْبِيْ مَا يِخَلِّيْه

لَوْ ذَاقْ مِنْ حِبِّهْ الْتِيَاعِيْ

 

بَابْقَى مِدَى عِمْرِيْ أدَارِيْه

وَالْوِيْ عَلَى الْعِشْرِهْ ذِرَاعِيْ

 

يَعْل السَّعَادِهْ سَاكِنِهْ فِيْه

وِالْحِبّ لِهْ زَادْ وْمِتَاعِيْ

 

رَبِّيْ يِحَقِّقْ لِهْ أمَانِيْه

وِيْكُوْن لِهْ حاَفِظْ وْ رَاعِيْ