لَبَّيْه مَا طَافَتْ الْبَسْمه وْهَبّ النِّسِيْم
وْلَبَّيْه مَا غَرِّدَتْ بِقْلُوْبنا الْحَالمه
يا (فْطَيْم) لا جَتْ مِنْ شْفَاهِكْ بِنَبْض الكريم
أقُوْل يَا عِزّ مَنْ يَمْلِكْ حَشَا (فاطمه)
آمِرْ وْسَوْلِفْ وْمَا يِذْبَحْ فؤاد اللَّئيم
إلاَّ الْهِوَى اللَّى بِنَيْنَا مَجْدِهْ وْعَالمه
مِلَيْت عَيْنِكْ وْتَحْسِدْنِيْ عَلَيْك الْحِرِيْم
وْمِلَيْت عَيْنِيْ وْقَلْبِيْ مِنْك وِشْ يالمه
غِيَابِكْ اللَّى شَعَلْ نَارِهْ وْقَلْبِيْ هِشِيْم
وِتْقُوْل ظَرْف الحياة ولا أحَدْ سالمه
وَاعْذِرْك وَاغْرَقْ بِصَوْتٍ نَبْرِتِهْ فِيْ الصّميم
سِحْرِهْ تَعَدَّى حِدُوْد جْهَازْ وِمْكالمه
يا نَبْضِيْ الطَّاهِرْ وْيَا عِشْقِنَا الْمِسْتِقِيْم
عروق قَلْبِيْ تِغَنِّيْ لِكْ وْهِيْ ظالمه
تِغَارْ وِتْغَارْ وِالْغِيْره بِقَلْب الحليم
أشَدّ نَارٍ تِوَلِّعْ فِيْ حَشَا (فاطمه)