لاَبِسْ الْغَيْمِهْ وَانَا قَلْبِيْ رِعُوْد..!!
كِلّ مَا تَبْرِقْ ثَنَايَاكْ الْعِذَابْ
أنْهِمِرْ غِيْرهْ عَلَيْك بْلاَ حِدُوْد
يَوْم أشُوْفِكْ بَيْن ذِرْعَانْ السِّحَابْ
إبْتِسَامِكْ شَهْد.. وَانْفَاسِكْ وِرُوْد
وْبَحِّتِكْ سِكَّرْ.. وْمَنْطُوْقِكْ عَذَابْ
كَنِّكْ إِلاَّ النَّوْد مِنْ فَوْق النِّفُوْد
وِالْقُمَرْ وِاللَّيْل فِيْ عِزّ الشَّبَابْ
دِهْن عُوْد.. وْعُوْد فِيْ عَيْن الْحِسُوْد
وِالنِّسَايِمْ لِكْ مَنَادِيْب وْثِيَابْ
مِنْ كِثِرْ مَا هَامْ بِكْ عِطْر الْوِجُوْد
امْتِطَى الذِّعْذَاعْ لِكْ صَهْوَةْ سَرَابْ..!
دَنّ عَيْنِكْ مِنْ زِمَنْ (عَادْ وْثَمُوْد)
مَا بَعَدْ شِرْبه مَلاَمْ وْلا حِسَابْ
بِنّ مِنْ مِثْعَابْ عِكْف أهْدَابْ.. سُوْد
لِهْ شِقَارْ الْخَيْل وَافْعَالْ الشَّرَابْ..!
زِدّ كِلّ النَّاسْ نَقْصِكْ فِيْه زَوْد..!!
جَلّ مِنْ سَوَّاكْ تِبْرٍ مِنْ تِرَابْ..!
صَدِرْ ثَامِرْ والخَصِرْ ضَامِرْ..!! جِحُوْد
وْعَجْز عَنْ أصْل الْجِسَد فِيْه اغْتِرَابْ..!!
الْجَمَالْ بْغَيْبِتِكْ مَا لِهْ وِجُوْد..!!
يَحْضِرْ بْحَضْرَتْك وِالاَّ انْ غِبْت غَابْ..!!