الإجْرَامْ التَّرْف..!!

بَعْض المواقِفْ شَرَّها لِلْحَشَا سَامْ

مَا هِيْ مواقِفْ حَرْب جَيْش وْرَهَايِنْ

أمَّا بضِحْكَة سِنّ وِالاَّ بسِلْهَامْ

يِحِيْن مِنْها مَوْت مَا هُوْ بْحَايِنْ

اجْرَامْ تَرْفَاتْ الصّبا اشَدّ الاِجْرَامْ

مَا مِنْه يَا كُوْد الْعَنَا وِالْغبَايِنْ

نَظْرَاتهن تَحْكِمْ عَلَيْنَا بِالاعْدَامْ

وِقْلوبنا تُوْخَذْ وْحِنَّا نِعَايِنْ

هذا هُو الشَّرّ الحقيقي والالام

بَسّ أغْلبه في الصَّدْر ما هُوْ بْبَايِنْ

مَا يِجْتِمِعْ يا اهْل الهوى اخْدَانْ وَاخْصَام

لكنّهن صَارَنْ خِصُوْم وْخِدَايِنْ..!!

ْ

نِتْعَبْ لهن ونْرِزّ للْعِشْق الاعْلام

وِمْن الْغَلا وِالشَّوْق نَعْمِرْ مِدَايِنْ

تجري بنا سُوْد اللّيالي والايَّام

وْتَرْمِيْ بِنَا رَمْي الْبَحَرْ لِلسِّفَايِنْ

لا عَرِّضَتْ مَنْ تِرْدَعْ الحسن بِلْثَامْ

الْوِدّ فِيْهَا مْبَيِّنٍ لِهْ بِوَاديِنْ

تَشْدِىْ لـ (وَضْحَا) رَبَّعَتْ عِرْق لَزَّامْ

بِالزَّيْن مَا تِحْتَاجْ لَجْنَةْ مِزَايَنْ

بِعْيُوْنها تَرْمِيْ عَلَى العاشِق سْهَامْ

وِانْ قِلْت أنَا مَجْرُوْح قَالَتْ: هِوَايِنْ

إجْرَامْ تَرْفَاتْ الصّبا اشَدّ الاجْرَامْ

مَا مِنْه يَا كُوْد الْعَنَا وِالْغِبَايِنْ