أهْل الْخَلِيْج أهْل الْوِفَا مَا هُمْ بِطَلاَّبَةْ حِرُوْب

لكنّهُمْ إنْ صَكَّتْ الْحَلْقه عَلَيْه بْطَانها

ضَجَّوْا تَرَى الْجَنِّهْ لَهَا مِنْ عَاِليْ الْعَالِيْ هِبُوْب

وِالأرْض هُمْ كِثْبَانها وْفِيْ السِّمَا جِنْحَانها

إنْ أقْبَلْ الصَّادِيْ لِفَوْا مِثْل الْمِطَرْ دَيْمٍ سِكُوْب

وِانْ إعْتِدَى الْعَادِيْ لِفَوْا نَارٍ عَلَى عِدْوَانها

الله يِحَفْظِكْ يَا خَلِيْج الْخَيْر مِنْ غَدْر الشِّعُوْب

اللَّى اشْتَعَلْ جَمْر الْحِسَدْ فِيْ قْلُوْبها وَاعْيَانها

أهْل الجزيره وِالْخَلِيْج لْهُمْ مِنْ الرَّحْمه قلوب

مَرَّتْ جِفَافْ الأرْض حَتَّى إسْتَبْشَرَتْ أحْزَانها

أهْل السَّلامْ الغانمين الْمِكْرِمِيْن أهْل الْكِرُوْوب

الْمَاسِحِيْن الدَّمْع فِيْ عْيُوْن الْبِشَرْ وَاجْفَانها

اللَّى إذَا الطَّاغِيْ طَغَى بِالشَّرّ وِالْوَجْه الْغِضُوْب

شَدَّوْا بِحَرْبٍ تِرْدَعْ وْجُوْهٍ كِثَرْ طِغْيَانها

أهْل الْخَلِيْج أهْل السَّلامْ شْيُوْخهم أصْل الطِّيُوْب

وِشْعُوْبهم أصْل العروبه قَلْبها وِلْسَانها

يَا أرْضَنَا أرْض الجزيره مَا لَنَا عَنْهَا غِرُوْب

لَوْ غَرِّبَتْنَا دْرُوْبنا تِرِدِّنَا رِيْضَانها

فِيْ شَرْقَهَا فِيْ غَرْبها شِمَالِهَا وْفـِ.. الْجِنُوْب

أهْل الْجزيره أهْلِنَا وِقْلُوْبنا أوْطَانها