كَاسِبْ الطَّوْلاَتْ

تِسْتَاهَلْ النَّامُوْس يَا فَخْر الاجْيَالْ

يَا كَاسِبْ الطَّوْلَاتْ رَاعِيْ الْيِمِيْلِهْ

مَا هُوْ غِرِيْبٍ مِنْك يَا طَيِّبْ الْفَالْ

الْمَجْد يِفْخَرْ بِكْ وْإِنْتِهْ سِلِيْلِهْ

حِيْن انْطَلَقْ شَوْط التَّحَدِّيْ والابْطَالْ

وْكَاسْ البطوله كِلّ عَيْنٍ تِخِيْلِهْ

مِنْ صَفْوَةْ خْيُوْل البسيطه وْخَيَّالْ

تشَارِدَنْ وِالْكِلّ مَعْدُوْد خَيْلِهْ

وِبْآخِرْ التَّرْتِيْب (بِيْ شَوْب) لازَالْ

وِتْبَاعِدَنْ عَنِّهْ مِسَافِهْ طِوِيْلِهْ

لكنّ مَعْ (بِيْ شَوْب) مَا تْخِيْب الامَالْ

يَاهِنْ كَمَا سَيْلٍ تَحَدَّرْ مِسِيْلِهْ

وتْدَاقِلَنْ كَنْهِنْ عَلَى جَبْهَةْ قْتَالْ

وْرَوَّحْ وْخَلاَّهِنْ جِموْعٍ قِتِيْلِهْ

فِيْ اْلمَرْكَزْ (الأوَّلْ) وْلَا يَنْظِرْ التَّالْ

عَيْنِهْ عَلَى كَاسْ البطوله يِشِيْلِهْ

وْحَوَّلْ بَلا مْنَافِسْ عَلَى اْلخَطّ يِخْتَالْ

أنَا اشْهَدْ أنِّهْ مُوْل مَا فِيْه حِيْلِهْ

وِاذَا بْزِعِيْم الْقَوْم مِنْ فَرْحِتِهْ يَالْ

عَسَاهْ بِالأفْرَاحْ فِيْ كِلّ لَيْلِهْ

تِسْتَاهَلْ النَّامُوْس يَا فَخْر الاَجْيَالْ

يَا كَاسِبْ الطَّوْلاَتْ رَاعِيْ الْيِمِيْلِهْ